वीरगंज । सूर्य नेपाल प्रा.लि.ले वीरगंजका दुई विद्यालयमा अत्याधुनिक कम्प्युटर ल्याब स्थापना गरी हस्तान्तरण गरेको छ । वीरगंज महानगरपालिका–३२ स्थित श्री मनमिश्र आधारभूत विद्यालय र वडा नं. ३१ स्थित सोलकपुर माध्यमिक विद्यालयमा शुक्रबार आयोजित छुट्टाछुट्टै कार्यक्रममा ल्याब हस्तान्तरण गरिएको हो ।
सूर्य नेपालका यज्ञबहादुर आलेका अनुसार सोलकपुर माध्यमिक विद्यालयमा १५ थान कम्प्युटर, १ थान प्रिन्टर र १ थान यूपीएससहितको ल्याब स्थापना गरिएको छ भने मनमिश्र आधारभूत विद्यालयमा १० थान कम्प्युटर, १ थान प्रिन्टर र १ थान यूपीएस उपलब्ध गराइएको छ । यसरी प्रविधिमूलक पूर्वाधार विद्यालयमै स्थापना भएपछि विद्यार्थीहरूलाई प्रत्यक्ष रूपमा डिजिटल शिक्षा सिक्ने अवसर मिल्ने बताइएको छ ।
मनमिश्र आधारभूत विद्यालयमा आयोजित कार्यक्रममा वीरगंज महानगरपालिकाको शिक्षा महाशाखा प्रमुख आनन्द लामिछानेले विद्यालयमा प्रविधि प्रवेश गराउनु ठूलो उपलब्धि भएको बताउँदै सूर्य नेपालले गरेको यो लगानीले विद्यार्थीहरूको भविष्य उज्ज्वल बनाउन योगदान पुर्याउने विश्वास व्यक्त गरे ।
विद्यालयका शिक्षक र अभिभावकहरूले कम्प्युटर ल्याब स्थापना भएपछि विद्यार्थीहरूको सिकाइ अझ व्यवहारिक र प्रविधिमैत्री हुने प्रतिक्रिया दिएका छन् । उनीहरूले यस किसिमको सहयोगले डिजिटल सीप, अनुसन्धान क्षमता र प्रतिस्पर्धी योग्यता विकासमा मद्दत गर्ने अपेक्षा गरेका छन् ।
