वीरगंज । प्रजापिता ब्रह्माकुमारी ईश्वरीय विश्व विद्यालयले “रक्तदान जीवनदान महादान” भन्ने मूल नारासहित अन्तर्राष्ट्रिय स्तरको ग्लोबल मेगा रक्तदान अभियान सञ्चालन गर्न लागेको छ।
आगामी भदौ ६ देखि ९ गतेसम्म नेपाल र भारतका विभिन्न स्थानमा आयोजना हुने यस अभियानमा १०० घण्टामा एक लाख पिन्ट रगत संकलन गर्ने लक्ष्य राखिएको छ। नेपालभर मात्र ३५ हजार युनिट रगत संकलन गरिने जनाइएको छ।
वीरगंजमा भदौ ७ गते शनिबार बिहान ८ बजेदेखि दिउँसो २ बजेसम्म छपकैया–२ स्थित विश्वदर्शन भवन परिसरमा विशाल रक्तदान शिविर आयोजना हुनेछ । वीरगंजमै ५ सय युनिट रगत संकलन गर्ने लक्ष्य रहेको आयोजकले जनाएको छ।
संयुक्त राष्ट्रसंघबाट सात पटक शान्तिदूत पुरस्कार प्राप्त ब्रह्माकुमारी संस्था UNICEF तथा ECOSOC का उच्चस्तरीय सल्लाहकारका रूपमा मान्यता पाएको, १३७ राष्ट्रमा सक्रिय संस्था हो । नेपाल रेडक्रस, रोटरी क्लब, विश्वविद्यालय, कलेज र विभिन्न संस्थाको सहकार्यमा देशभर रक्तदान शिविर सञ्चालन हुने कार्यक्रम तय भएको छ।
पत्रकार सम्मेलनमार्फत जानकारी दिँदै ब्रह्माकुमारी राजयोग सेवा केन्द्र, वीरगंजले भदौ ६ गते सिमरा र वरियारपुर, भदौ ७ गते वीरगंज, कलैया, कोल्हवी, चन्द्रपुर र गौरमा शिविर सञ्चालन हुने जनाएको छ।
क्षेत्रीय सञ्चालिका ब्रह्मचारिणी रबिना दिदीको विशेष उपस्थितिमा सम्पन्न पत्रकार सम्मेलनमा वरिष्ठ प्रशिक्षक गुनराज भाईजी, गोबर्धन भाईजी, छोटेलाल भाईजी, प्रकाश थारु लगायतको सहभागिता रहेको थियो।
संस्थाले स्वेच्छिक रक्तदानजस्तो पुण्यदायी कार्यले संकटमा परेका हजारौं जीवनलाई नयाँ जीवन दिने भएकाले यस अभियानलाई सफल बनाउन सम्पूर्ण सञ्चारमाध्यम र समाजको सहयोग आवश्यक रहेको जनाएको छ।
