वीरगञ्ज । वीरगञ्ज महानगरपालिका–३ स्थित एमइएस सेकेन्डरी बोर्डिङ स्कुलमा मंगलबार विद्यार्थी सपथग्रहण तथा ब्याच वितरण कार्यक्रम भव्यतापूर्वक सम्पन्न भएको छ।
कार्यक्रमको उद्घाटन प्याब्सन पर्साका अध्यक्ष सरोज प्रसाद चौधरीले मैनबत्ती बालेर गरेका थिए। प्रमुख अतिथिको रूपमा उपस्थित चौधरीले एमइएस स्कुललाई वीरगञ्जकै पुरानो र प्रतिष्ठित शैक्षिक संस्था भन्दै विद्यालयको योगदान र विद्यार्थीहरूको उपलब्धिको प्रशंसा गरे। साथै, नयाँ नेतृत्व सम्हाल्ने विद्यार्थीहरूलाई सपथग्रहण गराउँदै अनुशासन, लगनशीलता र जिम्मेवारीपूर्वक भूमिका निर्वाह गर्न प्रेरित गरे।
प्याब्सन केन्द्रीय सदस्य छेडुप लामाले पनि विद्यार्थीहरूलाई अनुशासनको पालना गर्दै नेतृत्वकर्ताको भूमिकामा गम्भीर बन्न सुझाव दिए।
कार्यक्रममा विभिन्न कक्षाका विद्यार्थीहरूले सपथग्रहण गर्दै ब्याच ग्रहण गरेका थिए। साथै, विद्यार्थीहरूले नृत्य, नाटक तथा सामाजिक सन्देशमूलक प्रस्तुति प्रस्तुत गरे। विशेषगरी दाइजो प्रथा विरुद्ध प्रस्तुत गरिएको नाटकले सबैको ध्यान आकर्षित गरेको थियो।
समारोहमा प्याब्सनका संस्थापक अध्यक्ष लालबाबु पटेल, मधेस प्रदेश सल्लाहकार मनि पाख्ररिङ, वडा नं. ३ का वडा अध्यक्ष बैजु स्वर्णकार, सशस्त्र प्रहरी निरीक्षक तेजबहादुर ठकुरी, सामुदायिक सेवा केन्द्र छपकैयाका अध्यक्ष ग्यासुदिन ठाकुरलगायतको उपस्थिति रहेको थियो।
विद्यालयका संस्थापक इमामुदिन अहमदको अध्यक्षतामा सम्पन्न कार्यक्रममा सहजीकरण कक्षा १० का महम्मद जिसान र कक्षा ९ की आसिया खातुनले गरेका थिए।
