वीरगंज । सशस्त्र प्रहरी बल, नेपाल नं. १३ गण हे.क्वा. पर्साको आयोजनामा तथा बिरगञ्ज तेक्वान्डो डोजाङ्गको विशेष सहयोगमा आजदेखि “Self-Defence/UAC अनुशिक्षण तालिम” औपचारिक रूपमा सुरु गरिएको छ।
गणपति सशस्त्र प्रहरी उपरीक्षक पुरन चन्द्र भट्टको प्रमुख आतिथ्यमा बिहान १० बजे विशेष समारोहबीच तालिम उद्घाटन भएको हो । कार्यक्रममा गणका अधिकृत, जुनियर अधिकृत, बिल्लादार/जवान, बिरगञ्ज तेक्वान्डो डोजाङ्गका प्रमुख प्रशिक्षक तथा 4th Dan Black Belt एशियन प्लेयर महमद वेशसहित ९ जना प्रशिक्षकहरूको सहभागिता थियाे।
तालिमको उद्देश्य र कार्ययोजनाबारे सशस्त्र प्रहरी निरीक्षक दिपेन्द्र प्रकाश मल्लले प्रस्तुतिकरण गर्दै आत्मरक्षाको परिचय, व्यवहारिक अभ्यास, सुरक्षा उपाय, लैङ्गिक हिंसा तथा दुर्व्यवहारबाट बच्ने उपाय, कानुनी सहायता प्रणाली, डेमो प्रदर्शन र शारीरिक व्यायामजस्ता विषयहरू समावेश गरिएको जानकारी दिए।
३५ जना सशस्त्र प्रहरी कर्मचारी (१० महिला र २५ पुरुष) सहभागी रहेको तालिम १० कार्यदिनसम्म दैनिक बिहान ७ बजेदेखि ९ बजेसम्म सञ्चालन हुनेछ।
प्रहरी उपरीक्षक भट्टका अनुसार, तालिमले सशस्त्र प्रहरी कर्मचारीहरूको आत्मरक्षा सीप, शारीरिक र मानसिक सशक्तिकरण तथा जोखिम अवस्थामा तत्काल प्रतिक्रिया दिन सक्ने क्षमता अभिवृद्धि गर्ने लक्ष्य लिएको छ।
