वीरगंज । जिल्ला प्रहरी कार्यालय पर्साले ३० लाख रुपैयाँ जरिवाना तोकिएको बैंकिङ कसूर मुद्दाका फरार प्रतिवादीलाई पक्राउ गरेको छ।
पर्सा जिल्ला अदालतको मुद्दा नं. ०८०-C१-०९६२, लगत नं. ६३०९ अनुसार देवेन्द्र कुमार कर्णको जाहेरीमा वादी नेपाल सरकार र प्रतिवादी वीरगंज महानगरपालिका–१६ बस्ने अम्बे ईन्टरप्राइजेज प्रा.लि.का सञ्चालक ३४ वर्षीय सुनिल कुमार साहलाई अदालतले दोषी ठहर गरेको थियो ।
लामो समय लुकी–छिपी बस्दै आएका साहलाई विशेष सूचनाको आधारमा बिहिबार फैसला कार्यान्वयन टोलीले निजको घरमै पुगेर पक्राउ गरेको जिल्ला प्रहरी कार्यालय पर्साका प्रवक्ता, प्रहरी नायब उपरीक्षक किशोर लम्सालले जानकारी दिए।
अदालतको फैसलाअनुसार साहलाई १० दिन कैद र ३० लाख रुपैयाँ जरिवाना तोकिएको छ । पक्राउ परेका साहलाई आवश्यक कानुनी प्रक्रिया पूरा गरी जिल्ला अदालतमा पेश गरिएको प्रहरीले जनाएको छ ।
