वीरगंज । युनिसेफ नेपाल र वीरगंज महानगरपालिकाको संयुक्त पहलमा पर्सा जिल्लामा पानीको बचत र जिम्मेवार प्रयोगसम्बन्धी सातदिने जनचेतनामूलक अभियान सुरु गरिएको छ । अभियानमा नेपाल रेडक्रस सोसाइटी, नेपाल खानेपानी संस्थान, दिगो विकास स्रोत केन्द्र, र समाजिक संस्था जिल्ला समन्वय समितिको सहकार्य रहेको छ।
हाल बर्खाको मौसम हुँदा पनि तराई, विशेषगरी मधेश प्रदेश, गम्भीर पानी संकटको सामना गरिरहेकाले दीर्घकालीन समाधानका लागि विद्यालय र समुदायस्तरमै सचेतना फैलाउने लक्ष्यका साथ कार्यक्रम सुरु गरिएको हो ।
कार्यक्रमको प्रारम्भ नेपाल राष्ट्रिय विद्यापीठ माध्यमिक विद्यालय र अलपाइन स्कुलका विद्यार्थीहरूलाई व्यावहारिक तालिमबाट गरिएको थियो । प्रशिक्षणमा घरेलु पानी प्रयोगमा बचत गर्ने उपाय, वर्षा पानी संकलन, चुहिने धारा मर्मत, र पानी पुनः प्रयोगका तरिकाहरू समेटिएको थियो ।
तालिम कार्यक्रम नेपाल रेडक्रस सोसाइटी वीरगंज शाखाकी वरिष्ठ सदस्य गुड्डी साहको नेतृत्वमा सम्पन्न भएको थियो भने नन्दनी गुप्ता, प्रिया कुश्वाहा, दुलारचन प्रसाद र आनंद यादवले सहकार्य गरेका थिए ।
आयोजकहरूका अनुसार यस्तो सचेतनामूलक अभियानले दीर्घकालीन रूपमा जल संकट न्यूनीकरणमा सहयोग पुर्याउने विश्वास लिएको छ। यस्तै कार्यक्रमलाई मधेश प्रदेशका अन्य प्रभावित जिल्लामा पनि विस्तार गर्ने तयारी भइरहेको जनाइएको छ।
