जनकपुरधाम । जनता समाजवादी पार्टी (जसपा) मधेश प्रदेश कमिटीले प्रदेश अध्यक्ष अशोक यादवमाथि प्रहरीले चलाएको मुद्दा फिर्ता नगरे आन्दोलनमा जाने चेतावनी दिएको छ। शुक्रबार जनकपुरधाममा आयोजित पत्रकार सम्मेलनमार्फत पार्टीले उक्त मुद्दालाई ‘झुठा र प्रतिशोधपूर्ण’ भन्दै तत्काल फिर्ता लिन माग गरेको हो।
घटना त्यसबेला चर्चामा आयो जब जसपा प्रदेश अध्यक्ष अशोक यादव र सर्लाहीका प्रहरी प्रमुख एसपी योगेन्द्र कुमार खड्काबीचको गालीगलौज भएको अडियो सार्वजनिक भयो। अडियो सार्वजनिक भएपछि प्रहरीले यादवविरुद्ध मुद्दा दर्ता गरी खोजी जारी राखेको छ। उनी हालसम्म फरार अवस्थामा रहेका छन्।
पत्रकार सम्मेलनमा जसपा मधेश प्रदेशकी उपाध्यक्ष निर्मला यादवले अध्यक्ष यादव निर्दोष रहेको दाबी गरिन् । उनले भनिन्, “गत बिहीबार पूर्वाधार विकास कार्यालयमा रातिको समयमा ताला खोल्दै कार्यालय सञ्चालन गर्दा प्रहरीले सुरक्षा दिएको थियो। त्यही घटनाको बारेमा जानकारी लिन खोज्दा एसपी खड्काले ‘मधेशी हो’ भनेर अपमानजनक व्यवहार गरे।”
उनले एसपी खड्कामाथि नै कारबाही गर्नुपर्ने माग गर्दै प्रशासनलाई मुद्दा फिर्ता लिन आग्रह गरिन्। अन्यथा पार्टी आन्दोलनमा उत्रन बाध्य हुने चेतावनी दिइएको छ।
जसपाले यस घटनालाई ‘मधेशी समुदायमाथिको हेपाहा प्रवृत्ति’ भन्दै पहिचान र सम्मानको मुद्दा फेरि उठाउने संकेत समेत गरेको छ।
