वीरगंज । नेकपा एमालेको भातृ संगठन अखिल नेपाल राष्ट्रिय स्वतन्त्र विद्यार्थी युनियन(अनेरास्ववियु)को केन्द्रिय सदस्यमा वीरगंज नर्सिङ क्याम्पसकी पुर्व स्ववियु सभापति मनिषा चौधरी निर्वाचित भएकी छन् ।
अनेरास्ववियुको २४औ राष्ट्रिय महाधिवेशनमा नयाँ नेतृत्व चयनका लागि काठमाडौंमा बिहीबार भएको निर्वाचनमा चौधरी केन्द्रिय सदस्य (मधेसी खुल्ला) मा ४८ मतका साथ निर्वाचित भएका हुन् ।
यस्तै अनेरास्ववियुको केन्द्रिय सदस्यमा वीरगंजका आसिफ अहमद निर्वाचित भएका छन् । अहमद केन्द्रिय सदस्य (मधेसी खुल्ला) मा ५२ मतका साथ निर्वाचित भएका हुन् ।
वीरगन्ज महानगरपालिका वडा नम्बर २ का स्थायीबासिन्दा आसिफ अनेरास्ववियुको वीरगंज महानगर कमिटी अध्यक्ष पनि हुन् ।
अनेरास्ववियुको केन्द्रिय अध्यक्षमा भने रामेछापका डा. सुजन कडरिया निर्वाचित भएका छन् । म्याग्दीका प्रकाश पौडेललाई ७ मतको झिनो अन्तरले पराजित गर्दै कडेरिया अध्यक्षमा निर्वाचित भएका हुन् ।
त्यसैगरी खुल्ला उपाध्यक्षमा रामेछापकै ई. विकास श्रेष्ठ भारी मतान्तरले विजयी भएका छन् । श्रेष्ठले ७०८ मत ल्याउँदा उनका प्रतिद्वन्द्वी राजकुमार ढकालले ४२९ मत प्राप्त गरे ।
त्यसैगरी महिला उपाध्यक्षमा अञ्जना सिवाकोटीले ७७५ मत ल्याउँदै निर्वाचित भएकी छन् । महासचिवमा दीपक धामी र उपमहासचिवमा कमल जोशी विजयी भएका छन् । धामीले ७८५ मत ल्याउँदा उनका प्रतिद्वन्द्वी आरके रोमसले ५५४ मत प्राप्त गरे ।
त्यसैगरी सचिवमा आकाश घर्ती, ई. रचना सापकोटा, ससीम बाबु खान र अधिवक्ता गोपाल नेपाल विजयी भएका छन् ।
