वीरगंज । वीरगंज महानगरपालिका वडा नं. २२ स्थित ड्राईपोट सडकखण्डको सिताराम चौकमा सवारी दुर्घटना हुँदा दुई जनाकाे मृत्यु भएकाे छ भने एक जना गम्भिर घाइते भएका छन् ।
प्राप्त जानकारी अनुसार, भुसा लोड गरी बिग्रिएर रोकी राखिएको भारतीय नम्बर प्लेट एचआर ५५ के ३९७१ भएको ट्रकमा वीरगञ्जबाट डाईपोट तर्फ जाँदै गरेको बागमती प्रदेश ०३-००४ प ८६१२ नम्बरको मोटरसाइकल ठोक्किँदा मोटरसाइकलमा सवार तीनजना पुरुष घाइते भएका थिए ।
घाइतेहरुलाई तत्काल नारायणी अस्पताल वीरगञ्जमा उपचारका लागि पठाइएकोमा दुईजनाको मृत्यु भएको छ भने एकजनाको अवस्था गम्भीर रहेको प्रहरीले जनाएको छ । मृत्यु हुनेमा पर्सा जिल्ला छिपहरमाई गाउँपालिका–०३, झलमैया टोल निवासी राम सरण यादवका २३ वर्षीय छोरा रामाकान्त यादव र स्थानीय सुसराम यादवका छोरा २३ वर्षीय विजय यादव रहेका छन् ।
दुवै जनाको उपचारको क्रममा बिहान ८:०० बजे मृत्यु भएको हो । यस्तै, मनिका राउत अहिरका छोरा २२ वर्षीय विजय कुमार यादव गम्भीर अवस्थामा उपचाररत छन् । दुर्घटनास्थलमा दुबै सवारी साधन फेला परेको र ट्रक चालक भने फरार रहेकोले खोजी कार्य जारी रहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक किशोर लम्सालले जानकारी दिए । हाल घटनासम्बन्धी थप अनुसन्धान भइरहेको उनले वताए ।
