वीरगंज । पर्सा जिल्ला अदालतले आफ्नै छोरीमाथि यौन दुव्र्यवहार गरी त्यसको भिडियो इन्टरनेटमा राख्ने व्यक्तिलाई पुर्पक्षका लागि कारागार पठाउने आदेश दिएको छ । बुधबार अदालतका न्यायाधीश प्रमेश पोखरेलको इजलासले ती व्यक्तिलाई हाडनाता बलात्कार, जबरजस्ती करणी तथा विद्युतीय कारोबार ऐन अन्तर्गतको कसुरमा अभियोग लगाउँदै थुनामा राख्ने आदेश दिएको हो ।
पर्सा प्रहरी र साइबर ब्यूरो, काठमाडौं भोटाहिटीको संयुक्त टोलीले करिब चार हप्ता अघि वीरगंजको छपकैयाबाट ३४ वर्षीय ती पुरुषलाई पक्राउ गरेको थियो । उनीमाथि आफ्नै नाबालिग छोरीलाई यौन शोषण गरी भिडियो खिचेको र सो सामग्री ‘गुगल ड्राइभ’मा अपलोड गरेर राखेको आरोप छ ।
साइबर ब्यूरोले बाल यौन शोषण सामग्रीको अनलाइन ट्रेसिंग गर्ने क्रममा ती सामग्री फेला पारेपछि अनुसन्धान सुरु गरिएको थियो । प्राप्त प्रमाणका आधारमा ब्यूरो र पर्सा प्रहरीले संयुक्त रूपमा चैत २२ गते उनलाई नियन्त्रणमा लिएको हो ।
अदालतको आदेशपछि अब मुद्दाको अन्तिम फैसला नआउन्जेल ती आरोपी थुनामा नै रहनेछन् ।
