वीरगंज । पशु कल्याणको लागि काम गरिरहेका एनिमल नेपाल नामक सँस्थाले बिहीबार वीरगंजमा पत्रकारसंग अन्तरक्रिया कार्यक्रम गरेको छ ।
भोक, प्यास र कुपोषण हुन नदिने, डर, त्रास र तनाव हुन नदिने, भौतिक तथा शीत, तापजन्य असुविधाबाट सुरक्षित गर्ने, पीडा, घउचोट र रोग व्याधिबाट सुरक्षित राख्ने, सामान्य व्यबहार अभिव्यक्त गरी बाँच्न पाउने अवस्था सुनिश्चित गर्ने पशु कल्याणकाे आधारभुत पक्ष भएकाे एनिमल नेपालका पर्सा र बारा फिल्ड सुपरभाईजर धर्मेन्द्र साहले वताए ।
अण्डा उत्पादन गर्ने कुखुराहरुको पालन गरी व्यवसाय सञ्चालन गर्दै आएका कुखुरापालन व्यवसायी वा उत्पादकलाई पिंजडामुक्त खोरबारे सचेतना अभिबृद्धि गराई, शसक्तिकरण गरी पिंजडामुक्त कुखुरापालन व्यवसायका लागि प्रोत्साहन गर्न अभियानकाे उद्देश्य भएकाे एनिमल नेपालका फिल्ड अफिसर शत्रुधन पटेलले वताए ।
यसका साथै सर्वसाधारण तथा उपभोक्ताहरु बिच छलफल, अन्तरक्रिया, भेटघाट, परामर्श गरी पिंजडामुक्त खोरमा पालिएका कुखुराहरुबाट प्राप्त अण्डाको उपभोगबारे सचेतना फैलाउने, अण्डा उत्पादन गर्ने कुखुराको कल्याणको बारेमा सचेतना जगाउने पनि अभियानकाे उद्देश्य रहेकाे उनले वताए ।
पर्सा र बारा जिल्लामा रहेका पशु बजारबाट जिउदो पशुहरु ढुवानी गर्दा उनीहरुलाई क्रुर तरिकाले ढुवानी गर्ने गरिएको एनिमल नेपालका अर्का फिल्ड अफिसर सिताराम पटेलले वताए । उनले ढुवानी गर्दा परवानीपुर र बाराको जितपुर बजारमा हचुवा भर चेकजाँच गरि पशुहरुलाई काठमाडौंसम्म ढुवानी गर्ने गरिएको बताए ।
उनले पशु सेवा ऐन २०५५ तथा सोको नियमावली २०५६ पशु ढुवानी मापदण्ड २०६४ अनुसार एउटा ट्रकमा बढी २० वटासम्म पशु ढुवानी गर्न सकिने भएपनि २४ वटा ठुलो पाडापडीहरुलाई कोचेर ढुवानी गर्ने गरिएको बताए । बढीमा आठ घण्टा ढुवानी गरेपछि पशुलाई ओरालेर दाना पानी खुवाउनुपर्ने भएपनि ब्यापारी तथा ढुवानीकर्ताहरुले त्यस्तो नगर्ने गरेकाे पटेलले वताए ।
वीरगंजस्थित मधुशाला रेसुरेन्टमा भएकाे कार्यक्रममा ३ दर्जन भन्दा बढी वीरगंजका संचारकर्मीहरुकाे सहभागिता रहेकाे थियाे ।
