वीरगंज । वीरगंजमा शुक्रबार नेपालको वीरगंज र भारत बिहारको महिला फुटबल टिमबिच भएको मैत्रीपूर्ण खेलमा वीरगंज विजयी भएको छ । प्रथम वीरगंज गोल्डकप फुटबल २०८० अन्तर्गत शुक्रबार भएको मैत्रीपूर्ण खेलमा भारतको बिहारलाई २–० ले हराउँदै नेपालको वीरगंज युथ एकेडेमी विजयी भएको हो ।
वीरगंजकाे आदर्शनगर रंगशालामा भएको मैत्रीपूर्ण खेलमा वीरगंजकाे जीतमा अनिषा मगर र कविता गुरुंगले गोल गरेका हुन् । कूल ७० मिनेट खेलाइएको खेलको पहिलो हाफ गोलरहित बराबरीमा सकिएको थियो ।
वीरगंजले दुवै गोल दोश्रो हाफमा गरेको हो । खेलको ४७ औं मिनेटमा सुनिता सुनारलले दिएको पासमा अनिषाले गोल गर्दै आफनो टिमलाई १–० को अग्रता दिलाएकी थिइन् । खेलको ६१ औं मिनेटमा कविताले थप एक गोल गर्दै वीरगंजलाई २–० को जीत दिलाउन सफल भइन् ।
उक्त मैत्रीपूर्ण खेलको वुमेन अफ दी म्याच वीरगंजकाे लागि दोश्रो गोल गरेकी कविता गुरुंग घोषित भइन् । मैत्रीपूर्ण खेलको विजेता र उपविजेता दुवै टिमलाई आयोजक भेट्रान सिटी क्लबले ट्रफी र मेडल प्रदान गरेको थियो । कात्तिक १८ देखि जारी वीरगंज गोल्डकप फुटबलको उपाधिका लागि फाइनल खेल शनिबार हुदैछ ।
फाइनलमा पुलिस क्लब र आर्मी क्लब भिड्दै
उपाधिका लागि शनिबार दुई विभागीय टिम नेपाल पुलिस क्लब र त्रिभुवन आर्मी क्लब भिड्दै छन् । मधेस प्रदेशकै सबैभन्दा उच्च धनराशीको यो प्रतियोगिता कार्तिक २५ गते सम्म चल्ने छ । प्रतियोगितामा नेपालका ६ र भारतका दुई गरी कूल आठ टिम सहभागी छन् ।
वीरगंज महानगरपालिकाको मुख्य प्रायोजनमा आयोजित प्रतियोगिताको उपाधि उपविजेता टिमले नगद ११ लाख ११ हजार १ सय ११ रुपैयाँ र उपविजेता टिमले नगद ५ लाख ५५ हजाार ५ सय ५५ रुपैयाँका साथै शील्ड र मेडल प्राप्त गर्नेछन् ।