वीरगंज । समाचार लेखेकाे विषयलाई लिएर पत्रकारलाई ज्यान मार्ने धम्की दिनेमाथी समाजवादी प्रेस संगठन पर्साले कारवाहीकाे माग गरेकाे छ । वीरगंजबाट संचालित नेपाल पोष्ट डेलीका उप सम्पादक संतोष साहलाई ज्यान मार्ने धम्की दिने घटना प्रति समाजवादी प्रेस संगठनले प्रेस विज्ञप्ती मार्फत खेद प्रकट गर्दै कारवाहीकाे माग गरेकाे हाे ।
संगठन पर्साले साेमबार एक प्रेस बिज्ञप्ती जारी गर्दै घटना प्रति गम्भीर ध्यान आकर्षण भएको जनाउँदै दोषी माथी कडा कारवाहीको माग समेत गरेकाे छ । संगठन पर्साका अध्यक्ष मनोज पटेलद्वारा हस्ताक्षरित बिज्ञप्तीमा समाचारप्रति चित्त नबुझे वा गुनासो भए त्यस उपर कानुनी उपचार खोज्नु पर्नेमा पत्रकारमाथि यस प्रकारले प्रस्तुत हुनु निन्दनीय र प्रेस विरोधी काम रहेको उल्लेख गरिएको छ ।
संगठनले यस्ता प्रेस विरोधी घटना नियन्त्रणमा गम्भीर भई पत्रकारलाई निर्वाध र निर्भीक रूपमा काम गर्ने वातावरण निर्माण गर्नुको साथै पिडकलाई कानुनी दायरामा ल्याई कारवाही गर्न सम्बन्धित निकायसँग जोडदार माग गरेको छ ।
