वीरगंज । वीरगंज महानगरपालिका वडा नम्बर १० काे वडाध्यक्षमा जनता समाजवादी पार्टी (जसपा) नेपालका सुशील कुमार कानु निर्वाचित भएका छन् ।
नेपाली कांग्रेसका निवर्तमान वडाध्यक्ष राम नगिना प्रसाद कानुलाई पराजित गर्दै ३३ वर्षीय सुशील आफ्नो पूरै प्यानलसहित वडा अध्यक्षमा निर्वाचित भएका हुन् । सुशीलले वडा अध्यक्ष राम नगिनालाई ४ सय ७३ मतको अन्तरले पराजित गर्दै विजयी भएको निर्वाचन अधिकृतको कार्यालय वीरगंजले जनाएको छ ।
आइतबार बिहान सम्पन्न वडा नम्बर १० को मतगणनाको अन्तिम परिणामअनुसार जसपाका सुशीलले १ हजार ५ सय ९६ मत पाउँदा काँग्रेसका राम नगिना १ हजार १ सय २३ मत मै सिमित भएका छन् ।
त्यस्तै नेकपा एमालेका अजय गुप्ता ८ सय १९ मत पाउँदै तेस्रो स्थानमा छन् भने स्वतन्त्र उम्मेदवार प्रकाश खेतान २ सय ३० मत प्राप्त गरी चौथो भएका छन् ।
वीरगञ्ज महानगरपालिकाकाे वडा नम्बर १० नेपाली कांग्रेसबाट मधेश प्रदेशका लागि जलस्रोत तथा उर्जामन्त्री ओमप्रकाश शर्माको गृह वडा हो ।
यस अघिकाे २०७४ काे निर्वाचनमा तत्कालिन सङ्घीय समाजवादी फोरम नेपालबाट वडाध्यक्षमा चुनाव लडेका सुशील कांग्रेसका राम नगिनासँग झिनो मतको अन्तरले पराजित भए थिए । सुशिल वडाध्यक्षमा पराजित भएपनि महानगरपालिकाको कार्यपालिका सदस्य पार्टी बनाएकाे थियाे ।
वडाध्यक्षमा विजयी सुशिलसहितका वडा समितिका सदस्यहरुलाई जसपाका वीरगंजका महानगरपालिका मेयरका उम्मेदवार राजेशमान सिंह, जसपाका नेता मुकेश द्विवेदी लगायतका नेता तथा उनका समर्थकहरुले मतगणना स्थल मै फुल माला, खादा र अविरकाे टिका लगाएर बधाई तथा सुभकामना दिएकाे निखिल बर्णवालले वताए ।
