वीरगंज । प्रतिनीधि सभा सदस्य (सांसद) प्रदिप यादवले भौतिक विकासका दृष्टिकोणले पछाडी परेको मधेश प्रदेशले विकास र सडकको क्षेत्रमा फड्को मारेको दावी गरेका छन् । वीरगञ्ज महानगरपालिका वडा नम्बर १८ भवानीपुरमा श्री नेपाल राष्ट्रिय माद्यामिक विद्यालयकाे निर्माण हुने भवन र ५ सय मिटर ढलान सडकको शिलान्यास गर्दै सांसद यादवले यस्ताे दाबी गरेकाे हुन् ।
प्रदेश सरकारको बिकास योजना अन्तर्गत निर्माण हुने विद्यालय भवन निर्माणले ग्रामिण क्षेत्रका विद्यार्थीहरुलाई सहज रुपमा अध्ययन गर्न सघाउ पुग्ने सांसद यादवको विश्वास छ । सो भवनबाट प्रत्यक्ष तथा अप्रत्यक्ष रुपमा १५ सय भन्दा बढी विद्यार्थी लाभान्वित हुने पर्सा क्षेत्र नं. १ का संघिय सांसद यादवले बताए ।
सोही अवसरमा वर्षाैदेखि सास्ती खेपिरहेका टोलबासीलाई मध्यनजर गर्दै सडक ढलान गर्न लागिएकाे सांसद यादवले वताए । हिलो, धुलो, खाल्डो लगायतका समस्याहरुका कारण सास्ती खेप्दै आएका बासिन्दाहरुले अब ढलान सडकबाट आवतजावत गर्न सक्ने उनले बताए ।
मधेश प्रदेशका प्रदेश सभा सदस्य जन्नत अन्सारीको सांसदिय विकास कोषबाट ३५ लाखको लागतमा निर्माण हुने ढलान सडकको शिलान्यास गर्दै जनता समाजवादी पार्टी (जसपा)का केन्द्रिय सदस्यसमेत रहेका सांसद यादवले मधेश र मधेशी समुदायको विकासका लागि जसपा बाहेक अरु कुनै विकल्प हुन नसक्ने दावी गरे ।
प्रदेश सभा सदस्य जन्नत अन्सारीले पनि विकास निर्माणका कामहरुमा हातेमालो गर्दै अघि बढ्नुपर्नेमा जोड दिए ।
