सलमान खान र आयुष शर्मा स्टारर ‘अन्तिमः द फाइनल ट्रुथ’ शुक्रबार रिलिज भयो । सलमान खान प्रशंसक उनको फिल्मको व्यग्रताका साथ प्रतिक्षा गरिरहेका थिए । फिल्म रिलिज भएपछि उत्साहमा प्रशंसकले सिनेमाघरभित्र आतिशबाजी गरे । त्यसपछि सलमान खानले आतिशबाजीका भिडियो सेयर गर्दै प्रशंसकलाई यसो नगर्न बिन्ति गरेका छन् ।
सलमान खानले आफ्नो इन्स्टाग्राम अकाउन्टबाट एउटा भिडियो सेयर गरेका छन् । यो भिडियोमा प्रशंसक सिनेमाघरभित्र फिल्म ‘अन्तिमः द फाइनल ट्रूथ’ चलिरहेकै बेला आतिशबाजी गरिरहेको देख्न सकिन्छ ।
सलमान खानले यो भिडियोसँगै लेखेका छन्, ‘म सबै प्रशंसकलाई हलभित्र पटका लिएर नजान आग्रह गर्दछु किनभने यसले आगलागीको अत्यधिक खतरा निम्त्याउँछ । यसले तपाईं र अरुको ज्यानलाई खतरा पनि हुनसक्छ । हल मालिकलाई मेरो आग्रह – पटकालाई सिनेमाघर भित्र लैजान अनुमति नदिनुहोस् र सुरक्षाकर्मीलाई प्रवेशद्वारमा यसको अनुगमन गर्न अनुरोध गर्छु । प्रशंसकलाई मेरो निवेदन – हरेक तरिकाले फिल्मको मज्जा लिनुहोस् तर कृपया यस्तो गर्नबाट भने बच्नुहोस् । धन्यवाद ।’
महेश मांजरेकरको निर्देशनमा बनेको फिल्म ‘अन्तिमः द फाइनल ट्रुथ’ बाट महिमा मकवानाले डेब्यू गरेकी छिन् । यो फिल्म हिट मराठी फिल्म मुल्सी प्याटर्नको हिन्दी रिमेक हो । फिल्म ‘अन्तिमः द फाइनल ट्रुथ’ ले ४.५० करोड भारुको ओपनिङ पाएको छ । यद्यपि, शनिबार र आइतबार विकेन्डमा फिल्मको कमाईमा वृद्धि हुने आशा गरिएको छ ।
https://www.instagram.com/tv/CWyH7ttomwV/?utm_source=ig_web_copy_link
