वीरगंज । घुर ताप्दा जलेर घाइते भएकी पर्साको छिपहरमाई गाउँपालिका–५ भिस्वाकी सायरा खातुनको उपचारका क्रममा मृत्यु भएको छ।
फागुन ४ गते आगो ताप्ने क्रममा जलेर घाइते भएकी खातुनको उपचारको क्रममा बुधबार राति काठमाडौँको कीर्तिपुर अस्पतालमा मृत्यु भएकाे हाे ।
आफ्नै घरमा घुर ताप्ने क्रममा फागुन ४ गते लुगामा आगो सल्किँदा खातुन घाइते भएकी थिइन् । आर्थिक अवस्था कमजारे भएका कारण उनको समयमै उपचार हुन सकेकाे थिएन । पछि गाउँपालिकाकाे एम्बुलेन्सले वीरगंज स्थित नारायणी अस्पताल ल्याइएकाे सायरकाे विभिन्न व्यक्तिकाे सहयाेगमा उपचार सुरु भएकाे थियाे ।
शरिरको ८० प्रतिशत भाग जलेको अवस्थामा रहेको हुँदा त्यहाँ उपचार हुन नसक्दा थप उपचारका लागि उनलाई कीर्तिपुर अस्पताल पठाइएको थियो । गाउँको ऐलानी जग्गामा बसोबास गर्दै आएकी खातुन विभिन्न राेगले ग्रसित थिइन ।
यस अघि पनि घुर ताप्ने क्रममा घाइते भएकी छिपहरमाई गाउँपालिका वडा नं. ५ भिस्वा कै एक महिलाकाे मृत्यु भएकाे थियाे । उनकाे पनि आर्थिक अभावका कारण उपचारमा समस्या भए पछि मृत्यु भएकाे थियाे ।
