वीरगञ्ज, २६ बैशाख ।
पर्सा प्रहरीले सालको तयारी गोलिया काठ सहित दुई जनालाई पक्राउ गरेको छ । वडा प्रहरी कार्यालय, श्रीपुरले पर्सागढी नगरपालिका वडा नम्बर ९ बस्ने बलिराम सहनी र चैती देवीलाई पक्राउ गरेको हो ।
वीरगञ्ज महानगरपालिकाको वडा नं. १३ स्थित रहेको वडा प्रहरी कार्यालय श्रीपुर अगाडीबाट बिहीबार विहान १०ः२० बजे दुबै जना पक्राउ परेका परेका हुन । पक्राउ परेका बलिराम ना ४ ख ६९५८ नम्बरको यात्रुबहाक बसका चालक हुन भने चैतिदेवी बसधनी हुन् ।
वागवानाबाट वीरगञ्जतर्फ आइरहेको बसमा अवैध रुपमा सालको गोलिया काठ ल्याउँदै गरेको सूचनाको आधारमा उनीहरुलाई ११ क्युफिट काठसहित पक्राउ गरिएको वडा प्रहरी कार्यालय श्रीपुरका प्रहरी निरीक्षक चक्रबहादुर मल्लले जानकारी दिए ।
बसमा खानतलासी गर्दा बसको डिक्की र छतमा लुकाएर ल्याउँदै गरेको ११ क्युफिट सालको तयारी गोलियाकाठ बरामद भएको प्रहरी निरीक्षक मल्लले वताए ।
बरामद गरिएको काठ, बस र पक्राउ परेका दुवै जनालाई आवश्यक कारबाहीका लागि जिल्ला वन कार्यालय पर्सामा बुझाइएको वडा प्रहरी कार्यालय श्रीपुरले जनाएको छ । बरामद गरिएको काठको मूल्य अन्दाजी ५० हजार रहेको अनुमान गरिएको छ ।
