पर्सा, २८ पुस।
नारयाणी सिचाई डिभिजन नम्बर ५ को ब्लाक नम्बर २ अन्तर्गतका बिएससी ४ र ५ मा अत्यधिक मात्रामा पानी छोडदा एक दर्जन भन्दा बढी कृषकहरुको ५ बिगहा भन्दा बढी मसुरो र गेहु वाली नष्ट भएको छ । नहरमा अत्यधिक मात्रामा पानी छोडिदा कालिकामाई गाउँपालिकाको वडा नम्बर २ भेडिहारीका अच्छेलाल साह, राअज्ञा चौरसिया, मुक्ती चौरसिया, रामबालक चौरसिया, भरत तुरहा लगायत दर्जनौ कृषकहरुको बाली नष्ट भएको हो ।
यसै गरी पकहामैनपुर गाउँपालिकाको वडा नमबर ४ लहारवथकरीमा पनि कृषकहरुको वाली नष्ट गरेको सोही वडा निवासी शम्भु यादवले बताए । पानी ओभर भई नहरको माथिल्लो भाग भई खेतमा पस्नाले मसुरो र गेहु वाली नष्ट भएको कालिकामाई गाउँपालिका वडा नम्बर २ का कृषक राअज्ञा प्रसाद चौरसियाले बताए ।
पानीले नहरको किनारको भाग फुटाए पछि नहरमा आउनेजाने बाटो पनि हिलो भई अवरुद्ध भएको छ । कार्तिक र मंसिरमा महिनामा लगाइएको गेहु वाली र मसुरो वालीलाई कम मात्रामा मात्रै पानी चाहिने भएकोले अत्यधिक पानी हुदा नष्ट भएको कृषकहरु बताएका छन ।
