वीरगंज, २५ असोज ।
कालिकामाई गाउँपालिकाको वडा नं. २, भेडिहारीमा रहेको श्री सुकई साह माध्यमिक विद्यालयलाई प्लस २ बनाउन मांग गर्दै गाउँ कार्यपालिकाको कार्यालय बिहिबार घेराउ गरिएको छ । १० प्लस २ को अनुमति दिलाउन गठित संघर्ष समितिले कालिकामाई गाउँ कार्यपालिकाको कार्यालय मुडली अगाडी दिन भरी धर्ना दिएको हो ।
गाउँ कार्यपालिकाले श्री सुकई साह माध्यमिक विद्यालयलाई १० प्लस २ संचालनको लागि अनुमति नदिएका कारण गाउँ कार्यपालिको कार्यालय घेराउ गरिएको संघर्ष समितिले जनाएको छ । विद्यालयलाई प्लस २ बनाउन अनुमति दिन गाउँपालिकालाई मौखिक र लिखित रुपमा आग्रह गर्दा पनि अनुमति नदिएकोले दबाव स्वरुप गाउँ कार्यपालिको कार्यालय घेराउ गरिएको संघर्ष समितिका ताजिन्द्र साहले वताए ।
हामी कार्यपालिकाको कार्यालय अगाडी धर्ना दिदा भित्र बोर्ड बैठक चलिरहेको थियो त्यही भएर आज विद्यालयलाई प्लस २ संचालनको लागि अनुमति दिने निर्णय हुन्छ भने हामी आशाबादी थियौं तर त्यसो हुन नसके पछि निराश भई घर फर्किएको साहले वताए ।
स्थानिय गैर सरकारी संस्था ब्रिलिएन्ट युवा क्लबको अगुवाईमा विद्यालयलाई प्लस २ बनाउन २ महिना देखी विभिन्न कार्यक्रम हुदै आएको छ । गाउँपालिकाको जेठो माध्यमिक विद्यालयको रुपमा रहेको विद्यालयलाई प्लस २ बनाउन अन्तरक्रिया कार्यक्रम, हस्ताक्षर अभियान संचालन गरिएको थियो ।
यस्तै गाउँपालिकालाई ज्ञापन पत्र समेत बुझाइए पनि विद्यालय प्लस २ संचालनको लागि अनुमति पाउन नसकेका कारण संघर्ष समितिको बुधबार बसेको निर्णय अनुसार गाउँ कार्यपालिका कार्यालय घेराउ गरिएको हो ।
गाउँ कार्यपालिका घेराउ कार्यक्रममा ब्रिलिएन्ट युवा क्लबका कार्यक्रम प्रमुख छठु साह, स्थानिय अगुवा ताजिन्द्र साह, जमुना चौरसिया, लालबाबु चौरसिया, रामबालक महतो कोइरी, चन्द्रिका राम, रामाधार साह तेली, सुबाष कुशवाहा, श्यामनारायण साह, आरस खाँ लगायतकाको उपस्थिती रहेको थियो ।
यता आज सम्बन्धीत वडा कार्यालयले विद्यलायलाई १० प्लस २ बनाउन गाउँ कार्यपालिकालाई सिफारिस गरेको छ । वडा नं. २ का वडा अध्यक्ष सोनालाल चौरसियाले संघर्ष समितिको दबावमा आएर विद्यालाई प्लस २ बनाउन सिफारिस गर्नु भएको वताइएको छ ।
