वीरगंज । मधेश प्रदेशकाे सर्लाहीमा दुईटा बालिकाकाे बलात्कार भएकाे भन्दै प्रहरी कार्यालयमा उजरी परेकाे छ ।

१६ वर्षीया बालिकालाई बलात्कार गरेको आरोपमा हरिवन नगरपालिका–३ का २८ वर्षीय श्याम कुमार यादवविरुद्ध इलाका प्रहरी कार्यालय हरिवनमा मंसिर ११ गते पीडित पक्षले उजुरी दिएका छन् ।

पीडितलाई आरोपितले मङ्सिर ७ गते बलात्कार गरेको भन्दै इलाका प्रहरी कार्यालय हरिवनमा उजुरी दिएको पीडित पक्षले बताएकाे छ ।

घटनापछि आरोपित यादव फरार रहेकोले खोजतलास भइरहेको इलाका प्रहरी कार्यालय हरिवनका इन्स्पेक्टर अनिलराज गिरीले जानकारी दिए । पीडितको स्वास्थ्य परीक्षण मङ्सिर १२ गते सर्लाही जिल्ला अस्पताल मलंगवामा गरिएकाे छ ।

यसैगरी १७ वर्षीया बालिकालाई बलात्कार गरेको आरोपमा हरिपुर नगरपालिका–४ का २५ वर्षीय दिपेन्द्र कुमार महतोविरुद्ध इलाका प्रहरी कार्यालय हरिपुरमा मङ्सिर १२ गते पीडित पक्षले उजुरी दिएका छन् ।

पीडित बालिकालाई आरोपितले मङ्सिर ६ गते बलात्कार गरेको भन्दै पीडित पक्षले इलाका प्रहरी कार्यालयमा उजुरी दिएको जनाएकाे छ ।

घटनापछि आरोपित महतो फरार रहेकोले खोज तलास भइरहेको इलाका प्रहरी कार्यालय हरिपुरका सई सुवाश यादवले जानकारी दिए । पीडितको स्वास्थ्य परीक्षण मङ्सिर १२ गते सर्लाही जिल्ला अस्पताल मलंगवामा गरिएकाे छ ।

वीरगंज । प्रहरीले श्रीमतीको हत्या गरी फरार रहेका श्रीमान सिरहा नगरपालिका-१५ सुखचैना गाउँका ४० वर्षीय देवेन्द्र यादवलाई पक्राउ गरेकाे छ । यादवविरूद्ध श्रीमतीलाई कुटपिट गरी हत्या गरेको आरोप छ ।

प्रहरीका अनुसार मंसिर ७ गते राति १० बजे बाँसको भाटा र इँटा प्रहार गरी यादवले ३० वर्षीया श्रीमती सञ्जितालाई मरणासन्न हुनेगरी कुटपिट गरेका थिए । कुटपिटबाट उनको घरमै मृत्यु भएपनि संजितालाई उपचार गराउन भन्दै यादवले भारतको जयनगरतर्फ लगेका थिए ।

भोलिपल्ट छिमेकीले सूचना दिएपछि ८ मंसिरको बिहान सुखचैना पुगेको प्रहरीले थप अनुसन्धान गर्दा कुटपिटको क्रममै संजितको मृत्यु भएको र उपचारको बहानामा शव भारत लगेको खुलेको सिरहाका डिएसपी रविन्द्रराज पाण्डेयले जानकारी दिए ।

उनका अनुसार प्रहरी चौकी खिरौना, इलाका प्रहरी कार्यालय माडर र जिल्ला प्रहरी कार्यालय सिरहाबाट खटिएको संयुक्त प्रहरी टोलीले माडरको बोर्डर क्षेत्रबाट गत शनिवार देवेन्द्रलाई पक्राउ गरी सोधपछु गर्दा श्रीमतीको शव भारतमै फालेर आएको बताएका थिए ।

नेपाल भारत सीमा क्षेत्रबाट करिब ३०/३५ किलोमिटरको दुरीमा रहेको भारतको मधुवनी जिल्लाको खजोली थाना अन्तर्गत सेलरा भन्ने ठाउँमा रहेको झाडीबाट आइतबार विहान सञ्जिताको शव फेला परेको थियो।

भारतीय प्रहरीसँगको समन्वयमा सम्पूर्ण कानूनी प्रक्रिया पूरा गरी सञ्जिता शव पोष्टमर्टम गरिएको डिएसपी पाण्डेयले बताए। उनका अनुसार देवेन्द्रलाई ९ मंसिरदेखि लागू हुनेगरी सिरहा अदालतबाट म्याद थप गरी घटनाको बारेमा थप अनुसन्धान भइरहेको छ ।

वीरगंज । सिरहाकाे कल्याणपुर नगरपालिका—८ की २७ वर्षीया संगिता दासको हत्या गरेको आरोपमा इलाका प्रहरी कार्यालय मिर्चैयाले उनका ५१ वर्षीय ससुरा रामअशिष दासलाई पक्राउ गरेकाे छ । 

आरोपितले बुहारीलाई कात्तिक २७ गते घरायसी बिवाद हुदाँ टाउकोमा बन्चरोले प्रहार गरी हत्या गरेको थियो । पीडितको घटनास्थलमै मृत्यु भएको र आरोपितलाई कानुन बमोजिम कारबाहीको लागि इलाका प्रहरी कार्यालय मिर्चैयामा कात्तिक २८ गते उजुरी दिएको मृतकका पति राजकिसोर दासले बताए । शवको पोष्टमार्टम प्रादेशिक अस्पताल सिरहामा कात्तिक २८ गते भएको थियो ।

इलाका प्रहरी कार्यालय मिर्चैयाका डिएसपी जितेन्द्र बस्नेतका अनुसार घटना पछि आरोपित फरार रहेका थिए । विशेष सूचनाको आधारमा आरोपितलाई लुकिछिपी बसेको स्थानबाट गिरफ्तार गरी कारबाही प्रक्रियाको लागि म्याद थप गराएको उनले वताए ।