वीरगञ्ज । खसीको मासु भन्दै बाख्रीको मासु बिक्री गरेको आरोपमा प्रहरीले काठमाडौंमा तीनजनालाई पक्राउ गरेको छ।
पक्राउ पर्नेमा भारतको सीतामढी घर भई हाल काठमाडौंको रातोपुलमा बस्दै आएका २५ वर्षीय महमद इम्रान मन्सुरी, नुवाकोट घर भई सिफल बस्ने १८ वर्षीय अरुण कार्की र मकवानपुरको हेटौँडा घर भएका २१ वर्षीय सुजन रसाइली रहेका छन्।
प्रहरीका अनुसार उनीहरूले रातोपुल नजिकै ‘सफिक मासु पसल’ सञ्चालन गरी खसीको मासु भन्दै बाख्रीको मासु बिक्री गर्दै आएका थिए। उक्त मासु प्रतिकिलो १ हजार ८ सय रुपैयाँका दरले बिक्री गर्ने गरेको प्रहरीको भनाइ छ।
प्रहरीले पसलबाट बिक्रीका लागि राखिएको बाख्रीको मासुसहित काट्नका लागि तयार पारिएको अर्को बाख्रीसमेत नियन्त्रणमा लिएको जनाएको छ।
पक्राउ परेका तीनैजनालाई प्रहरी वृत्त गौशालामा राखेर घटनाबारे थप अनुसन्धान भइरहेको प्रहरीले जनाएको छ।
