पर्सामा ७५ लिटर घरेलु मदिरा बरामद, सशस्त्र प्रहरीले नष्ट गर्‍यो

वीरगंज । सशस्त्र प्रहरी बल, नेपाल सीमा सुरक्षा गुल्म हे.क्वा. लहावरथकरी पर्साले अवैध रूपमा भारततर्फ लैजान लागिएको घरेलु मदिरा बरामद गरी नष्ट गरेको छ।

शुक्रबार बिहान करिब १०:३० बजे पर्साको पकाहाँमैनपुर गाउँपालिका–४ धोवियाटीला स्थित नेपाल–भारत सीमा क्षेत्रमा सशस्त्र प्रहरी नायब निरीक्षक ज्ञानबहादुर आले मगरको कमाण्डमा खटिएको मोटरसाइकल गस्ती टोलीले शंकास्पद गतिविधि देखेपछि चेकजाँच गरेको थियो।

सो क्रममा नेपालबाट साइकिलमा राखेर भारततर्फ अवैध रूपमा लैजान लागिएको करिब ७५ लिटर घरेलु मदिरा फेला परेको थियो। प्रहरी टोलीलाई देख्नेबित्तिकै मदिरा ओसारपसारमा संलग्न व्यक्ति साइकिलसहित फरार भएको सशस्त्र प्रहरीले जनाएको छ।

बरामद गरिएको करिब ७५ लिटर घरेलु मदिरा (अन्दाजी मूल्य रु. ७,५००) लाई स्थानीय जनप्रतिनिधि, नेपाल प्रहरी, स्थानिय पत्रकार तथा भद्रभलाद्मीहरूको रोहवरमा सशस्त्र प्रहरी बल, नेपाल सीमा सुरक्षा गुल्म लहावरथकरीको परिसरभित्रै नष्ट गरिएको सशस्त्र प्रहरीले जनाएकाे छ ।

मदिरा नष्ट गर्दा पकाहाँमैनपुर गाउँपालिका–४ का वडा अध्यक्ष ढेडी प्रसाद यादव, सशस्त्र प्रहरी नायब निरीक्षक ज्ञानबहादुर आले मगर, पत्रकार छहु साह तथा प्रहरी सहायक निरीक्षक सन्तोष भण्डारीलगायतको उपस्थिति रहेको थियो।