सेढवा । “थारु एकता और मौलिकता हमनीके शान, थारु भाषा संस्कृति और परम्परा हमनीके पहिचान” भन्ने नारासहित पर्साको पटेर्वासुगौली गाउँपालिकामा थारु सम्बतको नयाँ वर्ष २६५० तथा पाँचौँ माघी खिचडी महोत्सव भव्य रूपमा सम्पन्न भएको छ।
पटेर्वासुगौली गाउँपालिकाको आयोजनामा वडा नं. ४ को खुल्ला मैदानमा आयोजित उक्त कार्यक्रम गाउँपालिका अध्यक्ष दिनेश कुमार चौधरीको सभापतित्व तथा साबिक गाबिस पटेर्वासुगौलीका भूपू अध्यक्ष एवं जेष्ठ नागरिक परमेश्वर गौरोको प्रमुख आतिथ्यमा हर्षोल्लासका साथ सम्पन्न भएको हो।
महोत्सवमा राष्ट्रिय थारु कलाकार स्वस्तिका चौधरी, राष्ट्रिय थारु कलाकार तथा गायक सागर चौधरी र नेपाली निरहुवाले आकर्षक सांस्कृतिक प्रस्तुति दिँदै दर्शकहरूलाई झुमाएका थिए। साथै जिल्ला स्तरीय स्थानीय नृत्य समूहहरूबीच नृत्य प्रतियोगिता पनि आयोजना गरिएको थियो। प्रतियोगितामा पकडिया यूनिक ग्रुप प्रथम, ब्रह्मबाबा समूह फरहदवा द्वितीय र गुदरबाबा समूह सुगौली तृतीय भएका छन्। प्रथम हुने समूहलाई २१ हजार, द्वितीयलाई ११ हजार र तृतीयलाई ७ हजार रुपैयाँ नगदसहित ट्रफी प्रदान गरिएको थियो।
माघी मेलामा थारु परिकारका रूपमा हाँस, कुखुरा, परेवा मासु, घोंगी तथा सानो माछाका विभिन्न परिकारका स्टलहरू राखिएका थिए। साथै गाउँपालिकाको सहयोगमा उत्पादन गरिएको मसला तथा हाईजेनिक तरकारीका स्टलहरूले पनि मेलालाई थप आकर्षक बनाएका थिए।
यसैबीच, माघी मेलाको अवसरमा रक्तदान कार्यक्रम पनि सञ्चालन गरिएको थियो। नवजागृत युवा क्लब, पटेर्वासुगौली गाउँपालिका वडा नं. ४, पर्साको आयोजनामा तथा गाउँपालिकाको सहयोगमा सम्पन्न रक्तदान कार्यक्रममा ६० जनाले रक्तदान गरेका आयोजकले जानकारी दिएका छन्।
