वीरगंज । सशस्त्र प्रहरी बल, नेपाल पर्साले “२५औँ सशस्त्र प्रहरी दिवस २०८२” को अवसरमा पर्सा जिल्लामा एक विपन्न परिवारलाई सहयोग गरेको छ ।
पुस २० गते दिवसको अवसरमा वीरगंज महानगरपालिका वडा नं. २८, बगही निवासी मधेश आन्दोलनका जिउँदा शहीद ३६ वर्षीया मन्सी पटेलको निवासमा नं. १३ गण हे.क्वा. पर्साका गणपति सशस्त्र प्रहरी उपरीक्षक पुरन चन्द्र भट्टले भेटघाट गरी न्यानो कपडा (कम्बल) तथा खाद्यान्न सामग्री वितरण गर्नुभएको थियो ।
साेही दिन विभिन्न व्यक्ति तथा संस्थाको सहयोगमा निर्माण भएको जस्ताले छाएको तीन कोठे घरमा विद्युत् सुविधा नहुँदा कठिनाइ भइरहेको जानकारी पाएपछि गणपति भट्टले सशस्त्र प्रहरी बल, नेपालको तर्फबाट घरमा विद्युत् वायरिङ गरिदिने प्रतिबद्धता व्यक्त गर्नुभएको थियो ।
सोही प्रतिबद्धता अनुसार बिहिबार र शुक्रबार नं. १३ गण हे.क्वा. पर्साबाट खटिएको टोलीले मन्सी पटेलको घरका तीनै वटा कोठा तथा बाहिरी भागमा विद्युत् वायरिङ गरी पंखा समेत जडान गरेको सशस्त्र प्रहरी बल, नेपाल नं. १३ गण हे.क्वा. पर्साका सूचना अधिकारी प्रहरी नायब उपरीक्षक मोहनराज निरौलाले जानकारी दिए ।
सशस्त्र प्रहरी दिवसको अवसरमा गरिएको यस सहयोगले विपन्न परिवारलाई राहत मिलेको स्थानीयले बताएका छन् । सशस्त्र प्रहरीकाे याे कार्यलाई जिल्लाबासीले प्रशंसा समेत गरेका छन् ।
