वीरगंज । नागरिकता, राष्ट्रिय परिचयपत्र तथा पञ्जीकरण ऐन २०७६ विपरीतको कसूरमा संलग्न रहेको आरोपमा पर्सा प्रहरीले तीन जनालाई पक्राउ गरेको छ ।
जिल्ला प्रहरी कार्यालय पर्साका अनुसार योजनाबद्ध रूपमा झुटा विवरण पेश गरी जन्मदर्ता, विवाहदर्ता तथा नागरिकता लगायतका सरकारी कागजातहरू बनाइदिने कार्य भइरहेको भन्ने गोप्य सूचना प्राप्त भएपछि मिति २०८२।०९।०२ गते प्रहरी टोली खटाइएको थियो ।
प्रहरी टोलीले पर्सा जिल्लाको वीरगंज महानगरपालिका वडा नं. १६, नगवा क्षेत्रबाट दुई जना भारतीय पुरुष र एक जना महिलालाई आवश्यक कागजातसहित नियन्त्रणमा लिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक राजु कार्कीले जानकारी दिए ।
पक्राउ परेका व्यक्तिहरूविरुद्ध “नागरिकता/राष्ट्रिय परिचयपत्र तथा पञ्जीकरण ऐन २०७६” सम्बन्धी कसूरमा मुद्दा दर्ता गरी थप अनुसन्धान कार्य भइरहेको प्रहरीले जनाएको छ ।
