वीरगंज । वीरगंज महानगरपालिकाका उपमेयर ईम्तियाज आलमको संयोजकत्वमा आज संयुक्त बजार अनुगमन टोलीले शहरका विभिन्न पाउरोटी तथा बेकरी उद्योगहरूमा अनुगमन गरेको छ।
अनुगमन टोलीले पानीटन्की–८ स्थित शत्तिमान बेकरी एण्ड फुड प्रोडक्ट्स, श्रीपुर–११ रानिघाटस्थित शिला बेकरी तथा त्यही क्षेत्रको लक्की पाउरोटी उद्योगमा निरीक्षण गरेको थियो।
अनुगमनका क्रममा सफाइको अभाव, मूल्य सूची नटाँगिएको, व्यवसाय दर्ता प्रमाणपत्र नदेखिएको तथा म्याद गुज्रिएका पाउरोटी, पप, डोनट, बम पाउरोटी, सानो केक, बर्फी लगायतका सामग्री भेटिएपछि ती खाद्य सामग्री जफत गरी नष्ट गरिएको टोलीले जनाएको छ।
यसबाहेक केही उद्योगहरूले महानगरबाट व्यवसाय दर्ता नगरेको तथा केहीको दर्ता नवीकरण नभएका कारण ७ दिनभित्र आवश्यक प्रक्रिया पूरा गर्न महानगरपालिकाको कार्यालयमा उपस्थित हुन निर्देशन दिइएको छ।
अनुगमन टोलीमा उपभोक्ता हित संरक्षण मञ्च नेपालका अजित भुजेल, महानगरपालिकाका खाद्य अनुसन्धान अधिकृत बिभा मिश्रासहित नेहा मिश्र, सञ्जय महतो, मनोज कुमार दास लगायतको सहभागिता थियो।
