सेढवा । सशस्त्र प्रहरी बल, नेपाल सीमा सुरक्षा गुल्म सुवर्णपुरबाट खटिएको टोलीले पर्साको ठोरी गाउँपालिका–४, मालिबस्तीबाट नेपाल–भारत मार्ग हुँदै लैजाँदै गरिएको ९ किलोग्राम लागुऔषध गाँजा बरामद गरेको छ ।
सोमबार गस्ती तथा चेकजाँचका क्रममा प्र ०२–००१ प ५२०२ र बिआर २२ एके २९९४ नम्बरका दुई मोटरसाइकललाई जाँच गर्न खोज्दा चालकहरू मोटरसाइकल त्यागेर फरार भएको सशस्त्र प्रहरीले जनाएको छ।
चेकजाँच गर्दा मोटरसाइकलको ट्याङ्कीभित्र विशेष तरिकाले लुकाइ–छिपाइ राखिएको करिब ९ के.जी. गाँजा फेला परेको थियो । बरामद सामग्रीमा १ थान एन्ड्रोइड मोबाइल पनि रहेको सशस्त्र प्रहरी बल, नेपाल नं. १३ गण, मुख्यालय पर्साका सूचना अधिकारी सशस्त्र प्रहरी नायब निरीक्षक विश्वराज योन्जनले जानकारी दिए ।
बरामद गरिएको गाँजा, मोटरसाइकल तथा मोबाइल आवश्यक कारबाहीका लागि सम्बन्धित निकायमा बुझाउने प्रक्रिया चलिरहेको सशस्त्र प्रहरीले जनाएको छ।
