वीरगंज । संविधान दिवसको अवसरमा जनमत पार्टी पर्साले वीरगन्जस्थित सहिद स्मारकमा माल्यार्पण गर्दै सहिदप्रति श्रद्धाञ्जली अर्पण गरेको छ । कार्यक्रममा जेन्जी आन्दोलनका क्रममा प्राण गुमाएका सहिदप्रति मौन धारण गरी श्रद्धासुमन अर्पण गरिएको थियो ।
कार्यक्रममा बोल्दै जनमत पार्टी पर्साका जिल्ला अध्यक्ष ओमप्रकाश सरार्फले वर्तमान संविधान संघीय लोकतान्त्रिक गणतन्त्रको आधारशिला भएको उल्लेख गर्दै प्राप्त उपलब्धिहरूलाई संस्थागत गर्न अझै संघर्ष गर्नुपर्ने बताउनुभयो । उहाँले प्रत्यक्ष निर्वाचित कार्यकारी प्रमुख र सबै संवैधानिक अंग तथा आयोगमा प्रतिस्पर्धा मार्फत नियुक्ति हुनुपर्ने जनमत पार्टीको ‘नौलो गणतन्त्र’ विचारधाराको मूल आधार भएको स्पष्ट पार्नुभयो ।
सरार्फका अनुसार जेन्जी आन्दोलनका मागहरूको दिगो समाधानका लागि जनमत पार्टी दुई वर्षअघि देखि नै निरन्तर आन्दोलनरत छ ।
कार्यक्रममा केन्द्रीय सदस्य बिध्यालाल प्रसाद, रम्भा मिश्रा, श्याम गुप्ता, श्याम शंकर चौरसिया, सन्तोष साह, क्षेत्रीय संयोजक डा. मनोज सरार्फ, महानगर अध्यक्ष महादेव शर्मा, सचिव लोकेश कर्ण, क्षेत्र नम्बर–२ संयोजक शशी देव यादव, युवा दस्ताका जिल्ला अध्यक्ष मनोज साह, महिला अध्यक्ष अन्जना गुप्ता, युवा महानगर संयोजक संजय सिंह, उपाध्यक्ष संजय सरार्फ, हिरालाल राम, बिकाश गुप्ता लगायतको सहभागिता रहेको थियो ।
