काठमाडौँ । नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले देशमा सबै लोकतन्त्रवादी, गणतन्त्रवादी र परिवर्तनप्रेमी शक्तिबीच दह्रो एकता आवश्यक रहेको बताएका छन्।
संविधान दिवसको अवसरमा शुभकामना सन्देश जारी गर्दै अध्यक्ष दाहालले लोकतन्त्रको विकल्प अझ उन्नत लोकतन्त्र नै भएको उल्लेख गर्दै संविधान र लोकतन्त्रको रक्षा नै राष्ट्रको स्वतन्त्रताको रक्षा भएको बताए।
उहाँले हालै सम्पन्न जेनजी आन्दोलनलाई स्मरण गर्दै “समयले संविधानको निरन्तरतामा अझ विस्तार र परिमार्जन मागेको छ” भन्दै देशव्यापी पुनर्निर्माणमा लाग्न सम्पूर्ण पार्टी पङ्क्ति र जनसमुदायलाई आह्वान गरे। साथै २३ र २४ भदौका घटनाहरूको स्वतन्त्र, निष्पक्ष र उच्चस्तरीय छानबिन आयोग गठन गरी दोषीलाई कारबाहीको दायरामा ल्याउन सरकारसँग माओवादीको माग रहेको स्पष्ट पारे।
अध्यक्ष दाहालले भने, “जेनजी आन्दोलन लोकतन्त्रविरोधी होइन, बरु यथास्थिति र तदर्थवादी शासन प्रणालीको विरोधी र उन्नत लोकतन्त्रको पक्षधर हो। तथापि २३ र २४ भदौका आन्दोलनलाई एउटै कोणबाट हेर्न सकिँदैन; भदौ २३ को आन्दोलन वास्तविक जेनजी आन्दोलन थियो।”
संविधान दिवसको अवसरमा प्रचण्डले नेपाली जनतालाई शुभकामना दिँदै लोकतान्त्रिक मूल्य–मान्यता र संविधानको संरक्षणमा सबैलाई सक्रिय हुन आग्रह गरे।
