वीरगंज । राष्ट्रिय निजी तथा आवासीय विद्यालय एशोसिएसन नेपाल (एन–प्याब्सन) वीरगंजले हालै फैलिएको हैजा (Cholera) संक्रमण र GenZ आन्दोलन/प्रदर्शनका कारण विद्यालयहरूको पठनपाठनमा परेको असर न्यूनिकरण गर्न विशेष निर्णय गरेको छ ।
एन–प्याब्सनद्वारा बिहीबार जारी विज्ञप्तिमा विद्यार्थीहरूको शैक्षिक सत्र र अध्ययनक्रममा गम्भीर असर परेको भन्दै यसलाई तत्काल पूरा गर्ने उद्देश्यले शनिबार र सार्वजनिक बिदामा समेत विद्यालय सञ्चालन गरिने उल्लेख छ।
एन–प्याब्सनको निर्णयअनुसार आगामी असोज ३ गतेदेखि र त्यसपछि पर्ने शनिबारहरूमा समेत विद्यालय खुला रहनेछ। यस कदमले विद्यार्थीहरूको शैक्षिक हक सुरक्षित हुने विश्वास लिइएको एन–प्याब्सनले जनाएको छ।
एन प्याब्सन वीरगंजका नगर अध्यक्ष जियालाल गुप्ता र नगर सचिव शेख अजहरले संयुक्त रूपमा जारी गरेको विज्ञप्तिमा अभिभावक, शिक्षक, विद्यार्थी र सरोकारवालाहरूलाई यस अभियानमा सहयोग र समर्थनका लागि आह्वान गरिएको छ।
यस अघि प्याब्सन वीरगंजले पनि शनिबार र सार्वजनिक विदाका दिन विद्यालय संचालन गर्न आफ्ना सदस्य विद्यालयहरुलाई आग्रह गरेका थिए ।
