काठमाडौँ । जनमत पार्टीका वरिष्ठ उपाध्यक्ष अब्दुल खानसहित आधा दर्जन शीर्ष तहका नेताहरूले पार्टीको नेतृत्वप्रति असन्तुष्टि जनाउँदै सामूहिक राजीनामा दिएका छन् ।
उनीहरूले अध्यक्ष डा. सिके राउत नेतृत्वप्रति कठोर आलोचना गर्दै जेनजी आन्दोलनको रगतको अपमान भएको आरोप लगाएका छन् । नेपालमा विद्यमान विषम परिस्थितिमा पार्टीले जनभावना विपरीत चलाएको र नेतृत्व परिवर्तनको मागलाई बेवास्ता गरेको भन्दै उनीहरूले पार्टी छाडेको घोषणा गरेका हुन् ।
राजीनामा दिने नेताहरूमा वरिष्ठ उपाध्यक्ष अब्दुल खान, केन्द्रीय प्रवक्ता डा. शरद सिंह यादव, जनमत युवा संघका केन्द्रीय संयोजक संजय कुमार यादव, जनमत स्वास्थ्यकर्मी संघका संयोजक सि.के. सिंह, सुदूरपश्चिम प्रदेशका वरिष्ठ इन्चार्ज राजाराम चौधरी र राष्ट्रिय परिषद सदस्य तथा केन्द्रीय सदस्य विक्रम वहादुर बम रहेका छन् ।
नेताहरूले पार्टीको पद–स्वार्थमा नफसी नयाँ पुस्ताको चाहनाअनुसार सहकार्य गर्ने प्रतिबद्धता जनाएका छन् । साथै, लामो समयसम्म साथ र सहयोग गर्ने जनमत पार्टीका नेता तथा कार्यकर्ताहरूप्रति धन्यवादसमेत व्यक्त गरेका छन् ।
यी नेताहरुले बुधबार मात्र जनमत पार्टीभित्र नेतृत्व परिवर्तनको मागसहित पार्टीका शीर्ष पदाधिकारीहरूले अध्यक्ष डा. सिके राउत र संगठन विभाग प्रमुख डा. जयकान्त राउतलाई २४ घण्टाभित्र पदबाट राजीनामा दिन अल्टिमेटम दिएका थिए ।
