वीरगंज । वातावरणीय क्षेत्रको अग्रणी संस्था ‘लिभिङ विथ एन्भायरनमेन्ट नेपाल’ को वीरगंज शाखामा शनिबार एक विशेष सभा सम्पन्न भएको छ । सभामा संस्थाका केन्द्रीय अध्यक्ष आकाश चौहानको विशेष उपस्थितीमा नयाँ कार्यसमिति गठन गरिएको हो ।
नयाँ कार्यसमितिको अध्यक्ष पदमा लक्की बरनावल चयन भएका छन् भने उपाध्यक्षमा बसिर आलम गाद्दी, सचिवमा अंकुश पटेल, सह–सचिवमा धीरज कुशवाहा, कोषाध्यक्षमा सिमरन श्रीवास्तव, सह–कोषाध्यक्षमा बिक्की कुमार सिंह, कार्यक्रम समन्वयकमा सुरज पंडित कुम्हार, उप–कार्यक्रम समन्वयकमा मुन्ना कुमार, जनसम्पर्क प्रमुख (प्रो) मा शोभा कुमारी, सह–जनसम्पर्क प्रमुख (जोइन्ट प्रो) मा अजीत थाकुर हजाम र इकोच्याम्प समन्वयकमा रोहित यादव रहेका छन् । पदाधिकारीहरूले आजै शपथ ग्रहण गरेका छन् ।
सभाले तिन महत्त्वपूर्ण निर्णयहरू पनि गरेकाे छ । भ्रष्टाचारविरुद्धको आन्दोलनमा सहादत प्राप्त गरेका ‘जेन जेड’ युवा पुस्ताका शहीदहरूको सम्झनामा दुई मिनेट मौन धारण, नयाँ कार्यसमितिले यसपटक ‘पर्सा युवा महोत्सव २’ थप ठूलो र आकर्षक रूपमा आयोजना गर्ने घोषणा गरेको छ ।
महोत्सवमा विज्ञान प्रदर्शनी, नृत्य, कला–शिल्प, गायन, सामान्य ज्ञान, बुद्धिचाललगायत गतिविधि हुनेछन् । विजेताहरूका लागि ५० हजार रुपैयाँको पुरस्कार राशि तय गरिएको छ । नयाँ टोलीले गाउँ–गाउँमा जैविक खेती र पानीको महत्त्वबारे जनचेतना अभियान सञ्चालन गर्ने निर्णय गरेको छ ।
सभामा केन्द्रीय अध्यक्ष आकाश चौहानले नयाँ कमिटीलाई बधाई दिंदै वातावरणीय संरक्षणको महत्त्वमा जोड दिएका थिए । “यदि हामीले हाम्रो वातावरणको हेरचाह गरेनौं भने भविष्य डरलाग्दो हुनेछ,” उनले भने, “त्यसैले यो क्षेत्रमा युवाहरूको सहभागिता आवश्यक छ।”
