काठमाडौं । अन्तरिम प्रधानमन्त्रीसहित मन्त्रिपरिषद्का लागि सिंहदरबारमा नयाँ व्यवस्थापन थालिएको छ । हालको गृह मन्त्रालय भवन जलेर ध्वस्त भएपछि नयाँ गृह मन्त्रालय भवनमा प्रधानमन्त्री तथा मन्त्रिपरिषद्को कार्यालय सार्ने तयारी गरिएको छ।
गृह मन्त्रालयको नयाँ भवन काठमाडौं उपत्यका ट्राफिक प्रहरी कार्यालय बग्गीखाना गेटनजिक रहेको छ । प्रधानमन्त्री बस्ने कोठादेखि सचिवालय, मन्त्रिपरिषद् बैठकका लागि आवश्यक फर्निचर, सोफा, कार्पेट लगायतको तयारी धमाधम भइरहेको छ ।
ध्वस्त भएको गृह मन्त्रालय भवनको साटो शिक्षा, विज्ञान तथा प्रविधि मन्त्रालयलाई केशरमहलमा सार्ने र त्यहाँ गृह मन्त्रालय सञ्चालन गर्ने तयारी पनि भइरहेको छ।
मुख्यसचिव एकनारायण अर्यालले शुक्रबार बिहान सिंहदरबारस्थित प्रधानमन्त्री तथा मन्त्रिपरिषद्को कार्यालयसहित विभिन्न मन्त्रालयको स्थलगत अनुगमन गरेका थिए। उनका अनुसार प्रधानमन्त्री कार्यालय बस्नै नसकिने अवस्थामा पुगेको छ।
