वीरगंज । वीरगंज महानगरपालिका–२२ स्थित जगरनाथपुर चोकको ढाँटमा भइरहेको अवैध असुली अझै रोकिएको छैन।
महानगरपालिकाले “जडिबुटी, कबाडी तथा जीवजन्तु कर” उठाउने जिम्मा अमित ठेक्का पट्टालाई दिएको छ। सम्झौताअनुसार ठेकदारले महानगर क्षेत्रभित्र उत्पादन संकलन तथा व्यवसायिक कारोबारमा मात्र कर लिन पाउने व्यवस्था छ।
तर ठेकदार कम्पनीले नियम विपरीत सम्पूर्ण भारतीय मालवाहक सवारीसाधनबाट प्रतिगाडी ४ सयदेखि ५ सय रुपैयाँसम्म असुली गर्दै आएको स्थानीयले बताएका छन्।
प्रत्यक्षदर्शीका अनुसार ढाँटमा खटिएका कर्मचारीहरूले बलजबरजस्ती कर असुली गर्ने मात्र नभई, मागअनुसार पर्ची नकटाउने चालकलाई कुटपिटसमेत गर्ने गरेका छन्।
यस्ता घटनाप्रति स्थानीयवासी पटक–पटक विरोधमा उत्रिँदा विवाद समेत भएको भए पनि सम्बन्धित निकायको ध्यान नपुगेको गुनासो छ।
स्थानियका भनाइअनुसार दिनहुँ आईसीपी हुँदै निस्कने सयौं भारतीय मालवाहक सवारीसाधनसँग रंगदारी असुली भइरहेको छ, तर सरोकारवाला निकाय मौन बसिरहेको छ। उनीहरूले यसरी भइरहेका गतिविधिले नेपालको प्रतिष्ठामै आघात पुर्याएको भन्दै कानुनी उपचार खोज्ने तयारी थालेका छन्।
यस विषयमा प्रतिक्रिया दिँदै वीरगंज महानगर प्रमुख राजेशमान सिंहले नियम विपरीत असुली गर्नेहरूमाथि कडा कारबाही गरिने चेतावनी दिएका छन्। उनले महानगरलाई यसबारे लिखित जानकारी नभएको बताए पनि जानकारी आउँनेबित्तिकै कानुनी प्रक्रिया अघि बढाइने स्पष्ट पारेका छन् ।
