वीरगंज । राष्ट्रिय समाचार समिति (रासस) को ६४ औँ वार्षिकोत्सवको अवसरमा मंगलबार वीरगंजमा “जिम्मेवार पत्रकारिता र राससकाे भूमिका” विषयक अन्तरक्रिया कार्यक्रममा सम्पन्न भएकाे छ । रासस वीरगंज कार्यालयकाे आयाेजनामा भएकाे कार्यक्रममा वाेल्ने वक्ताहरुले जिम्मेवार पत्रकारिता समाज सुधारको प्रमुख आधार भएको बताएका हुन् ।
कार्यक्रमलाई सम्बोधन गर्दै मधेश प्रदेशका भूमि व्यवस्था, कृषि तथा सहकारी मन्त्री जनार्दन सिंह क्षेत्रीले पत्रकार पनि जिम्मेवार हुनु पर्ने वताए । उनले पत्रकारमाथि प्रश्न उठाउन पाईनेकी नपाईने भन्दै प्रश्न गर्दै पत्रकार पनि जिम्मेवार र जवाफदेहि हुनु पर्ने धारणा राखे ।
कार्यक्रमका प्रमुख अतिथी समेत रहेका मन्त्री क्षेत्रीले स्वतन्त्र पत्रकारिता मात्रै समाजलाई सही दिशामा लैजान सक्षम हुने बताए । उनले पत्रकारिता कुनै पनि दबाब वा प्रभावमा नपरी स्वतन्त्र रूपमा सञ्चालन हुनु आवश्यक रहेको उल्लेख गर्दै राससको भूमिकाको प्रशंसा गरे । राससले समाजका विविध मुद्दा उठान गर्दै सरकारका गतिविधि नागरिकसम्म पुर्याउने महत्त्वपूर्ण कार्य गरिरहेको मन्त्री क्षेत्रीकाे भनाई थियाे ।
जिल्ला प्रशासन कार्यालय पर्साका निमित्त प्रमुख जिल्ला अधिकारी निशानराज गौतमले पर्सा जिल्लामा राससले देखाएको सक्रियता उल्लेखनीय रहेको बताए । उनले राससले आम नागरिकका प्रत्यक्ष सरोकारका विषयलाई प्राथमिकतामा राखेर समाचार सम्प्रेषण गर्दै आएको बताए ।
त्यस्तै, जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्रले लागु औषध दुव्र्यसन नियन्त्रणदेखि सुरक्षा सम्बन्धी अन्य विषयमा रासससँग समन्वय गरेर प्रभावकारी अभियान सञ्चालन गर्न सकिने धारणा व्यक्त गरे ।
वीरगंज उद्योग वाणिज्य संघका बरिष्ठ उपाध्यक्ष हरि गौतमले राससलाई सबै सञ्चार माध्यमको लागि अत्यन्तै भरपर्दो स्रोतको रूपमा चित्रित गरे । उनले भने, “राससबाट प्रकाशित समाचारहरू अन्य सञ्चारमाध्यमहरूले समेत प्रकाशन गर्ने भएकाले यसको सूचना प्रवाह महत्वपूर्ण छ । वीरगंजका प्रमुख मुद्दाहरूलाई स्थापित गर्न रासससँग सहकार्य आवश्यक छ ।”
रासस वीरगंज कार्यालयका प्रमुख हिमाल लम्सालकाे प्रमुख आतिथ्यतामा भएकाे कार्यक्रममा नेपाल पत्रकार महासंघका केन्द्रीय सचिव अशोक तिवारी, नेपाल बिमा प्राधिकरण मधेश प्रदेशकी प्रमुख प्रिती देव, प्रतिक दैनिकका प्रकाशक एवं सम्पादक, राससका सेवाग्राही विकास शर्मा, युवा अभियन्ता दिलिपराज कार्की लगायतले कार्यक्रममा राससको योगदानको समीक्षा गर्दै विभिन्न सुझाव प्रस्तुत गरेका थिए ।
कार्यक्रमको स्वागत मन्तव्य राख्दै रासस वीरगंजका प्रमुख लम्सालले राससले हाल ७७ वटै जिल्लाका समाचार संकलन, लेखन तथा प्रकाशन गरी नेपाली, अंग्रेजी, मैथिली र अवधि भाषामा समाचार उपलब्ध गराइरहेको जानकारी दिए ।
उनका अनुसार, सीमित स्रोतसाधनका बाबजुद राससले हाल २४ घण्टा समाचार सम्प्रेषण सेवा सञ्चालन गरिरहेको छ । राससले दैनिक नेपालीमा ११० वटा, अंग्रेजी तथा अन्तर्राष्ट्रिय समाचार ३५–३५ वटा प्रकाशन गर्दै आएको जानकारी दिँदै उनले भविष्यमा भोजपुरी भाषामा पनि समाचार सेवा विस्तार गर्ने योजना रहेको खुलासा गरे ।
जिल्ला प्रशासन कार्यालय पर्साकाे सभाहलमा भएकाे कार्यक्रमको सहजीकरण सञ्चारकर्मी सूर्यनारायण वि.क.ले गरेका थिए ।
