वीरगंज । बारा निर्वाचन क्षेत्र नं. २ मा राेचक प्रतिस्पर्धा देखिएकाे छ । जनता समाजवादी पार्टी (जसपा) नेपालका अध्यक्ष उपेन्द्र यादव र जनमत पार्टीका उम्मेदवार शिवचन्द्र कुशवाहा बिच राेचक प्रतिस्पर्धा देखिएकाे हाे ।
प्रतिनिधि सभा सदस्यकाे बैशाख १० गते सम्पन्न उपनिर्वाचनकाे मतगणना अहिले शिक्षा तालिम केन्द्र कलैयामा जारि छ । सुरुवाती देखि नै जसपाका अध्यक्ष यादवले अग्रता लिए पनि बिचमा फेरी जनमतका कुशवाहा पछाडी पारेका थिए । पछि फेरी जसपाका यादवले अग्रता लिएका थिए ।
साेमबार राति ९ बजे सम्म यादवले कुशवाहा भन्दा ६ सय मतकाे अग्रता कायम गरेकाे थियाे । तर पछि राति १० बजेकाे पछिलाे मतपरिणाम अनुसार मतान्तर घटढै गएकाे थियाे । यादवले ३ हजार २ सय १४ मत ल्याउँदा कुशवाहाले २ हजार ८ सय १३ मत ल्याएका थिए । तेस्राे स्थानमा एमालेका उम्मेदवार पुरुषाेतम पाैडेलले एक हजार ३ सय ३५ ल्याएका थिए ।
राष्ट्रिय स्वतन्त्र पार्टीका रमेश खरेलले ६१४ मत, आम जनता पार्टीका अरुण कुमार ज्ञवालीले २ सय ६९ मत पाएका थिए ।
यस क्षेत्रमा एक लाख ५ हजार मतदाता रहेपनि ६५.६६ प्रतिशत ६९ हजार एक सय ७ मत मात्र खसेकाे छ । जस मध्ये हाल सम्म ८ हजार ५ सय ८ मत गणना भइसकेकाे जिल्ला निर्वाचन कार्यालय बाराका निर्वाचन अधिकारी सराेज चाैधरीले जानकारी दिए ।
करैयामाई गाउँपालिका र सुर्वण गाउँपालिकाकाे वडा नं. १ देखि ५ सम्म मतगणना भइसकेकाे निर्वाचन अधिकृतकाे कार्यालयले जनाएकाे छ ।
शिवचन्द्रको दावी “जसपाकाे गढमा राम्राे मत पाए, चुनाव मै जित्छु”
जनमत पार्टीका उम्मेदवार शिवचन्द्र कुशवाहले आफूले नै चुनाव जित्ने दावी गरेका छन् । उनले जसपाकाे पकड भएको क्षेत्रमा समेत आफूले राम्रो मत प्राप्त गरेको बताउँदै निर्वाचनको अन्तिम मतपरिणाम आउँदा आफै जित्ने दावी गरेका हुन् ।
मतगणना स्थल बाहिर सञ्चारकर्मीहरुसँग कुरा गर्दै कुशवाहले करैयामाईमा जसपाको पकड क्षेत्र भएपनि आफूले सम्मानजनक मत प्राप्त गरेको उल्लेख गर्दै जित्ने दावी गरे ।
हाल करैयामाई गाउँपालिकाका विभिन्न वडाको मतगणना भइरहेको छ । सुरुवाती चरणमा अग्रता लिएका यादवलाई केहि समयका लागि कुशवाहले पछारेका थिए । यद्दपी पछिल्लो मतपरिणामअनुसार यादवले फेरी अग्रता लिएका छन् ।
करैयामाईमा आफूले सम्मानजनक मत पाएको र महागढीमाईको मतपेटिका खुले आफूले अग्रता लिने बताउँदै कुशवाहले भने, ‘करैयामाई १, २ र ३ भनेको जसपाले जितेको ठाउँमा मेरो मत नै अघि देखिएपछि यो मलाई बोनस आएको प्रमाणित नै गरिसक्यो । अब अन्त गन्दा अघिपछि हुन्छ । हुँदै जाँदाखेरि अन्तिममा महागढिमाईले सबैलाई पछार्दिन्छु ।’
