वीरगंज । वीरगंज नर्सिङ क्याम्पसमा आइतबार सम्पन्न स्वतन्त्र विद्यार्थी यूनियन (स्ववियू) को निर्वाचनमा बहुमत सदस्यसहित नेकपा एमाले निकट अखिल नेपाल राष्ट्रिय स्वतन्त्र विद्यार्थी यूनियन विजयी भएको छ ।
क्याम्पसमा आइतबार राति सम्पन्न भएको मतदानको नतिजाअनुसार एकजना सदस्य बाहेक सम्पूर्ण पदाधिकारी र सदस्यमा अनेरास्ववियू विजयी भएको हो ।
सभापतिमा अनेरास्ववियूकी मनिषा चौधरी निर्वाचित भएकी छन् । ९१ मतसहित चौधरी सभापतिमा निर्वाचित भएको निर्वाचन अधिकृत रोमिना श्रेष्ठले जानकारी दिइन् ।
चौधरीकी निकटतम प्रतिस्पर्धी नेपाल विद्यार्थी संघकी यामिनी खड्काले भने ६३ मत मात्रै पाएको श्रेष्ठले बताइन् ।
यस्तै सचिवमा पनि अनेरास्ववियूकै सृष्टि तिमिल्सिना ८९ मतका साथ, कोषाध्यक्षमा पनि अनेरास्ववियूकै अर्चना गुप्ता ९२ मतका साथ निर्वाचित भएकी छन् ।
सदस्यमा अनेरास्ववियूकै मुना श्रेष्ठ र विवेक रानाभाट तथा नेविसंघकी स्मृति थापा निर्वाचित भएका हुन् ।
त्यसैगरी समानुपाति तर्फ अनेरास्ववियूले ९० मत र नेवि संघले ६३ मत प्राप्त गरेकाे छ । समानुपातिककाे एक मत बदर समेत भएकाे निर्वाचन समितिले जनाएकाे छ ।
