वीरगंज । पर्सा क्षेत्र नम्बर २ को (क) का प्रदेश सभा सदस्य (विधायक) राजेश्वर प्रसाद साहले आफनो राजनीतिक चरित्र हत्या गर्ने नियतले आफनाे विरुद्ध सामाजिक सन्जालमा भ्रमपूर्ण हल्ला फिजाइएको बताएका छन् ।
नेपाली काँग्रेसबाट प्रदेशसभा सदस्यमा निर्वाचित साहले पार्टी भित्रकै केहि नेता विशेषको निर्देशनमा अराजक तत्वहरुले आफु विरुद्ध निराधार हल्ला फैलाउने दुष्प्रयास गरेकाले त्यसको भ्रममा नपर्न आग्रह समेत समेत गरेका छन् ।
नेपाली काँग्रेस जिल्ला कार्य समिति पर्साले आफुलाई कारबाही गरेको भनेर केहि नेता विशेषको निर्देशनमा अराजक तत्वले फेसबुक मार्फत भ्रम फिजाएको भन्दै साहले यो कुरा भ्रामक र झुठा रहेको बताए ।
उनले आफुलाई पार्टीले कुनै कारबाही नगरेको भन्दै साहले फेसबुकमा फिजाइएको हल्ला बारे जिल्ला सभापति जनार्दन सिंह क्षेत्री र अनुशासन समितिका संयोजक समेत रहेका प्रवक्ता रमेश पाण्डे दुवै नेतालाई फोनबाट सम्पर्क गरेर सोध्दा पनि यस बारे दुवै जना अनविज्ञ रहेको पाइएको बताए ।
जिल्लाकै एक नेताले आफु प्रति पूर्वाग्रह राखेर आफना आसेपासे मार्फत भ्रामक हल्ला फिजाएर आफनो राजनीतिक चरित्र हत्या गर्न खोजेको साहकाे भनाई छ । पार्टीले कारवाही गरेको विषयमा आफुलाई कुनै लिखित वा मौखीक जानकारी समेत नआएको बताउँदैै साहले यस्ता भ्रामक गतिविधीले पार्टीलाई समेत कमजोर बनाउने वताए ।
त्यसैले यस्ता भ्रामक र अराजक गतिविधीमा संलग्न नेता र कार्यकर्तालाई कारबाही गर्न पनि उनले पार्टीको जिल्ला नेतृत्वसंग आग्रह समेत गरेका छन् । आफनो निर्वाचन क्षेत्रका नेता कार्यकर्ता र जनताको समर्थन आफु प्रति रहेको कुरा दुई दिन अघि मात्र भएका वडा भेलाहरुले पुष्टि गरिसकेको भन्दै साहले आफना बारेमा भ्रामक प्रचार नगर्न सम्बन्धित पक्षलाइ चेतावनी पनि दिए ।
यता नेपाली कांग्रेस पर्साका प्रवक्ता रमेश पाण्डेले पनि विधायक साह माथी कुनै किसिमकाे कारवाही नभएकाे वताए । पार्टीको मर्यादा बिपरित कार्य गरेको भन्दै उजुरी परेको अधारमा स्पष्टिकरण मात्र सोधिएको प्रवक्ता पाण्डेले बताए ।
विधायक साहमाथी कारवाही गर्ने अधिकार जिल्ला कार्य समितिसंग नरहेको बताउँदै पाण्डेले फेसवुकमा लेखिएको हल्लाको पछि नलाग्न सम्बन्धित सबैलाई आग्रह समेत गरे । उनले विधायक साहलाई कारवाही गर्ने अधिकार जिल्ला समितिसंग नरहेकाे समेत प्रष्ट पारे ।
