वीरगंज : कन्चनपुरकी १३ वर्षीया बालिका निर्मला पन्तको बलात्कारपछि हत्या भएको एक वर्ष पुरा भएको छ । एक बर्ष बितिसक्दा पनि सरकारले अपराधी अझै पत्ता लगाउन नसकेको भन्दै वीरगन्जमा शुक्रबार प्रदर्शन गरिएको छ ।
निर्मलालाई न्याय देउ भन्दै वीरगंजको घण्टाघरमा प्रदर्शन गरिएको हो । वीरगंजका सचेत युवायुवतीले निर्मलालाई न्याय देऊ भन्ने नारा लेखिएको प्ले कार्ड बोकेर प्रदर्शन गरेका हुन ।
त्यसअघि उनीहरुले घण्टाघर चोकको सडकमा बसेर निर्मलाले न्याय नपाएको एक वर्ष अर्थात ३६५ दिन पुगेको भन्दै ३६५ आकृति देखिने मानव साङलो पनि प्रर्दशन गरेको अभियानका सरोज चौरसियाले वताए ।
यसैबीच युवाहरुले शुक्रबारदेखि नै निर्मलाका बलात्कारी र हत्यारा पत्ता लगाई कारबाहीको माग गर्दै हस्ताक्षर अभियान पनि सुरु गरेका छन ।
हस्ताक्षर अभियान वीरगन्ज महानगरपालिकाका ३२ वटै वडामा सञ्चालन गरी एक लाख व्यक्तिको हस्ताक्षर संकलन भएपछि जिल्ला प्रशासन कार्यालय मार्फत प्रधानमन्त्री र गृहमन्त्रीलाई बुझाइने अभियानका जय साहले वताए ।
