जनकपुरधाम । धनुषाको जनकपुरधाम उपमहानगरपालिका–८ स्थित दशरथ तलाउमा मंगलबार बिहान एक पुरुषको शव फेला परेको छ।
दशरथ मन्दिरअघि रहेको पोखरीमा पहिचान खुल्न नसकेको अन्दाजी ५५ वर्षीय पुरुषको शव फेला परेको हो। मृतकको हालसम्म सनाखत हुन नसकेको प्रहरीले जनाएको छ।
स्थानीयले बिहान करिब पौने १० बजे पोखरीमा एक पुरुष तैरिरहेको खबर गरेपछि प्रहरी घटनास्थल पुगेको थियो। प्रहरीले शव पोखरीबाट निकालेर आवश्यक प्रक्रिया पूरा गरी परीक्षणका लागि प्रादेशिक अस्पताल जनकपुरधाम पठाएको छ।
धनुषाका प्रहरी प्रवक्ता एवं प्रहरी नायब उपरीक्षक ओमप्रकाश खनालका अनुसार प्रारम्भिक अनुसन्धानका क्रममा मृतक अघिल्लो दिन नै पोखरीमा डुबेको हुनसक्ने आशङ्का गरिएको छ।
घटनाबारे थप अनुसन्धान भइरहेको प्रहरीले जनाएको छ।
