वीरगंज । वीरगंज महानगरपालिका–९ स्थित जिल्ला प्रशासन कार्यालय नजिक रहेको गढिमाई लजमा पार्किङ गरिएको ई–स्कुटरको ब्याट्री पड्किँदा आगलागी भएको छ । बिहीबार बिहान करिब ७ बजे भएको आगलागीबाट स्कुटर पूर्ण रूपमा जलेर नष्ट हुनुका साथै लजका विभिन्न सामग्रीमा समेत क्षति पुगेको छ ।
मधेश प्रदेश ०३–०३९ प १४४३ नम्बरको ई–स्कुटर लज अगाडि पार्किङ गरिएको अवस्थामा अचानक ब्याट्री पड्किएर आगो लागेको प्रत्यक्षदर्शीहरूले बताएका छन् । आगो तीव्र रूपमा फैलिँदा स्कुटरसँगै लजभित्र रहेका चौकी, लत्ताकपडा, इन्टरनेट उपकरण, एसी, पंखा, होर्डिङ बोर्ड लगायतका सामग्री जलेर नष्ट भएका छन् ।
लज तथा स्कुटरका धनी किशन साह कानुका अनुसार कुनै पूर्व संकेतबिना पार्किङ गरिएको स्कुटरबाट एक्कासि धुवाँ निस्किएपछि विस्फोटजस्तै आवाज आएको थियो । त्यसलगत्तै आगो सल्किएर आसपासका संरचनामा फैलिएको उनले बताए ।
आगलागीको सूचना पाएपछि सशस्त्र प्रहरी बल, नेपाल प्रहरी, नेपाली सेना तथा वीरगंज महानगरपालिकाको दमकल घटनास्थलमा पुगेको थियो । सुरक्षाकर्मी र स्थानीयवासीको सहयोगमा आगो नियन्त्रणमा लिइएको भए पनि स्कुटर र लजका सामग्रीमा उल्लेखनीय क्षति पुगेको छ ।
घटनापछि ई–स्कुटरको ब्याट्री सुरक्षाबारे पुनः प्रश्न उठेको छ । पीडित पक्षले स्कुटरमा भएको आगलागीको वास्तविक कारण पत्ता लगाउन सम्बन्धित निकायले प्राविधिक अनुसन्धान गर्नुपर्ने माग गरेका छन् । पछिल्लो समय देशका विभिन्न स्थानमा विद्युतीय सवारीसाधनका ब्याट्रीमा समस्या देखिएका घटनाहरू सार्वजनिक भइरहेका बेला वीरगंजको यो घटनाले पनि ई–स्कुटरको गुणस्तर तथा सुरक्षा मापदण्डबारे गम्भीर अध्ययन आवश्यक रहेको सरोकारवालाहरूले बताएका छन् ।
