वीरगंज । वीरगंज महानगरपालिकाका मेयर राजेशमान सिंह नागरिकता तथा लिखत किर्तेसम्बन्धी मुद्दामा पर्सा जिल्ला अदालतमा ४ लाख १५ हजार रुपैयाँ धरौटी बुझाएर रिहा भएका छन् ।
पर्सा जिल्ला अदालतका न्यायाधीश गायत्री प्रसाद रेग्मीको इजलासले मेयर सिंहलाई लिखतसम्बन्धी कसुरमा ४ लाख रुपैयाँ तथा झुट्टा विवरण पेश गरी नागरिकता बनाएको मुद्दामा १५ हजार रुपैयाँ धरौटी माग गर्दै रिहा गर्न आदेश दिएको अदालतका श्रेस्तेदार प्रभाकर कुमार मल्लिकले जानकारी दिए ।
अदालतको आदेशअनुसार धरौटी रकम बुझाएपछि मेयर सिंह मंगलबार साँझ अदालत परिसरबाटै रिहा भएका हुन् । रिहाइलगत्तै अदालत परिसरमा पुगेका सयौं समर्थकहरूले उनको स्वागत गर्दै नाराबाजीसमेत गरेका थिए ।
नागरिकता लिखत किर्तेसम्बन्धी कसुरमा अनुसन्धानका लागि पर्सा जिल्ला अदालतले जेठ १२ गते मेयर सिंह, उनकी पत्नी रिता भट्टराई तथा वीरगंज–३ का तत्कालीन स्थानीय पञ्जिकाधिकारी भिखारी रायविरुद्ध पक्राउ पुर्जी जारी गरेको थियो । सोही आदेशका आधारमा प्रहरीले मंगलबार बिहान पर्साको ठोरी गाउँपालिका–२ स्थित ठोरी जंगल रिसोर्टबाट मेयर सिंहलाई नियन्त्रणमा लिएर अदालतमा उपस्थित गराएको थियो ।
अदालतमा मेयर सिंहको बयानपछि थुनछेक बहस भएको थियो । मेयर सिंहको तर्फबाट वरिष्ठ अधिवक्ता रामेश्वर सेढाई, कमलमोहन पोखरेल, प्रमोद साहलगायतले बहस गरेका थिए भने जाहेरवालाको तर्फबाट चन्द्रिका पटेलसहितका कानुन व्यवसायी तथा नेपाल सरकारका तर्फबाट जिल्ला न्यायाधिवक्ता मनोज कुमार गुप्ताले बहस गरेका थिए ।
वीरगंज–३ निवासी लियाकत अलीको जाहेरीका आधारमा दर्ता भएको उक्त मुद्दामा मेयर सिंहमाथि झुट्टा विवरण पेश गरी नागरिकता बनाएको तथा लिखत किर्ते गरेको आरोप छ । सरकारी वकिलको कार्यालयका अनुसार २०८० साल माघमा परेको उजुरीका आधारमा अनुसन्धान अघि बढाइएको थियो ।
उक्त मुद्दामा मेयर सिंहले रिता भट्टराईकी छोरी रुविना श्रेष्ठलाई आफ्नो छोरी देखाई फर्जी जन्मदर्ताका आधारमा नागरिकता बनाएको आरोप लगाइएको छ । यद्यपि, मेयर सिंहले रिता भट्टराई आफ्नो दोस्रो पत्नी रहेको दाबी गर्दै आएका छन् ।
अदालतको आदेशसँगै मेयर सिंह धरौटीमा रिहा भए पनि उनीविरुद्धको मुद्दाको अन्तिम फैसला भने हुन बाँकी रहेको छ ।
