वीरगंज । मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउन महाअभियान नेपाल’ का संयोजक दुर्गा प्रसाईँमाथि प्रहरीले मुद्दा चलाउने तयारी गरेको छ । उनलाई सोमबार राति वीरगंजस्थित सिद्धार्थ दियालो होटलबाट पक्राउ गरिएको हो ।
जिल्ला प्रहरी कार्यालय पर्साका प्रवक्ता डीएसपी हरिबहादुर बस्नेतका अनुसार प्रसाईँमाथि अनुसन्धान भइरहेको छ । प्रहरी स्रोतका अनुसार उनीमाथि साइबर अपराध सम्बन्धी मुद्दामा अदालतबाट म्याद थप गरी अनुसन्धान अगाडि बढाउने तयारी गरिएको छ ।
वीरगंजको मुख्य सडक विस्तार अभियान अन्तर्गत सडक क्षेत्रमा बनेका संरचना हटाउने सरकारी कार्यको विरोध गर्दै प्रसाईँले सरकारविरुद्ध जनतालाई उक्साउने गतिविधि गरेको आरोप प्रहरीले लगाएको छ । सोमबार वीरगंज आएका प्रसाईँले भत्काइएका घरधनीहरुलाई बैंकको ऋण नतिर्न आग्रह गरेको विषयलाई पनि प्रहरीले अनुसन्धानको आधार बनाएको जनाएको छ । प्रहरी स्रोतका अनुसार उक्त कुरा प्रसाईँले स्वयं स्वीकार गरेका छन् ।
प्रवक्ता बस्नेतका अनुसार पछिल्लो समय सामाजिक सञ्जाल तथा विभिन्न डिजिटल माध्यममार्फत प्रसारित प्रसाईँका अभिव्यक्ति, भिडिओ तथा सामग्रीको डिजिटल परीक्षणसमेत भइरहेको छ ।
सोमबार वीरगंज पुगेका प्रसाईँको मंगलबार बिहान वीरगंजस्थित प्रसिद्ध गहवामाई मन्दिरमा दर्शन गर्ने कार्यक्रम तय गरिएको थियो । तर त्यसअघि नै उनलाई होटलबाट प्रहरीले नियन्त्रणमा लिएको थियो ।
प्रसाईँ पक्राउ परेपछि उनका समर्थकहरुले सोमबार राति जिल्ला प्रहरी कार्यालय पर्सा अगाडि विरोध प्रदर्शन गरेका थिए । मंगलबार बिहान पनि प्रदर्शनका लागि जम्मा भएका समर्थकहरुलाई प्रहरीले हटाएको थियो । अहिले पनि केही समर्थकहरु जिल्ला प्रहरी कार्यालय अगाडि बसिरहेका छन् ।
