वीरगंज । जिल्ला प्रशासन कार्यालय पर्साले जोखिमपूर्ण अवस्थामा रहेका घर तथा टहरामा व्यापार व्यवसाय सञ्चालन नगर्न सर्वसाधारणलाई आग्रह गरेको छ।
सडक डिभिजन, हेटौंडाको सडक विस्तार कार्यक्रम अनुसार यही वैशाख ६ गते आइतबार वीरगंजकाे मितेरी पुलदेखि गणडक चौकसम्मको निर्धारित सीमाभित्र पर्ने घर–टहराहरू भत्काइएको थियो । अधिकांश घरधनीहरूले स्वस्फूर्त रूपमा आफ्ना संरचना हटाई व्यवस्थापन गरिरहेको भए पनि केही स्थानमा भत्किएका तथा जोखिमयुक्त संरचनामा पुनः व्यापार सञ्चालन भइरहेको पाइएको प्रशासनले जनाएको छ ।
यस्ता जोखिमपूर्ण संरचनामा व्यापार सञ्चालन गर्दा घरधनी, व्यवसायी तथा सर्वसाधारण सबैको ज्यान जोखिममा पर्ने भएकाले तत्काल त्यस्ता गतिविधि बन्द गर्न प्रशासनले चेतावनी दिएको छ । साथै, सम्भावित दुर्घटनाबाट हुने क्षतिको जिम्मेवारी स्वयम् घरधनीले वहन गर्नुपर्ने र प्रचलित कानूनअनुसार कारबाही हुने स्पष्ट पारिएको छ ।
जोखिमयुक्त संरचनाको व्यवस्थापन गर्ने क्रममा कामदारको सुरक्षालाई उच्च प्राथमिकता दिन पनि प्रशासनले अनुरोध गरेको छ। उक्त सूचना जिल्ला विपद् व्यवस्थापन समितिको शुक्रबार बसेको बैठकको निर्णयअनुसार प्रकाशित गरिएको सहायक प्रमुख जिल्ला अधिकारी विनोद कुमार पोखरेलले जानकारी दिएका छन्।
