वीरगंज । पर्साको बिन्दबासिनी गाउँपालिका वडा नं. ४ प्रसौनीभाठ्ठा अमरपट्टीस्थित दशगजा सीमा क्षेत्रमा रहेका अवैध संरचना हटाइएको छ।
बिहीबार सशस्त्र प्रहरी सीमा सुरक्षा गुल्म हे.क्वा. अलौबाट खटिएको टोली, प्रहरी चौकी अमरपट्टीको टोली तथा भारतको पूर्वी चम्पारण जिल्ला सिसुवा ग्राम पंचायत–१ अन्तर्गत सशस्त्र सीमा बल (SSB) ४७ बटालियन ‘सी’ कम्पनी धुपाटोलाबाट खटिएको संयुक्त टोलीले उक्त कारबाही गरेको हो।
संयुक्त टोलीले दशगजा क्षेत्रमा अतिक्रमण गरी अवैध रूपमा सञ्चालनमा रहेका खुल्ला मदिरा पसल, भट्टी तथा बेचबिखनका लागि बनाइएका टहराहरू हटाएको सशस्त्र प्रहरीले जनाएकाे छ । कारबाहीका क्रममा नेपालतर्फ ५ वटा टहरा, ३ वटा मदिरा पसल र १ वटा भट्टी तथा भारततर्फ ३ वटा टहरा हटाइएको जनाइएको छ।
सीमा क्षेत्रमा हुने अवैध गतिविधि नियन्त्रण तथा अतिक्रमण रोक्न संयुक्त रूपमा निगरानी र कारबाहीलाई तीव्र पारिएको सशस्त्र प्रहरी बल नेपाल नं. १३ गण हे.क्वा. पर्साका सूचना अधिकारी प्रहरी नायब उपरीक्षक मोहन राज निरौलाले जानकारी दिए । उनका अनुसार सीमा क्षेत्रमा अवैध संरचना तथा गतिविधि नियन्त्रणका लागि यस्ता अभियान आगामी दिनमा पनि निरन्तर जारी रहनेछन्।
