वीरगंज । नेपाली कम्युनिष्ट पार्टीका नेता तथा पर्सा क्षेत्र नं. २ का उम्मेदवार मनोज चौधरीसहित चार जनाविरुद्ध बुधबार पर्सा जिल्ला अदालतमा अभियोग पत्र दायर गरिएको छ।
जिल्ला सरकारी वकील कार्यालय पर्साले वीरगंज महानगरपालिका–१७ निवासी ४६ वर्षीय मनोज कुमार चौधरी, पर्सागढी नगरपालिका–३ निवासी ६७ वर्षीय सत्यनारायण दास थारु, बारा प्रसौनी गाउँपालिका–४ निवासी ३२ वर्षीय सहाब आलम अन्सारी (सवारी चालक) र धनुषाकाे धनुषाधाम नगरपालिका–९ धारापानी निवासी ३० वर्षीय सुरज कार्कीविरुद्ध विस्फोटक पदार्थ तथा निर्वाचनसम्बन्धी कसुरमा अभियोग दायर गरेको हो।
मुलुकी फौजदारी कार्यविधि संहिता, २०७४ को दफा ३२ बमोजिम अभियोग पत्र दायर गरिएको जिल्ला सरकारी वकील कार्यालय पर्साले जनाएको छ।
प्रहरीले गत फागुन १९ गते मनोज चौधरी सवार बा.१० च.१२५० नम्बरको कारबाट विस्फोटक पदार्थजस्तो देखिने शंकास्पद वस्तु फेला परेको आरोपमा नेता चौधरीसहित चारै जनालाई नियन्त्रणमा लिएकाे थियो । त्यसपछि प्रहरीले चारै जनालाई २१ दिनसम्म हिरासतमा राखेर अनुसन्धान गरेकाे थियो।
अनुसन्धान सम्पन्न भएपछि प्रहरीले सोमबार अनुसन्धानकाे फाइल सरकारी वकील कार्यालयमा बुझाएको थियो । सोही आधारमा बुधबार सरकारी वकीलकाे कार्यालयले अभियोग दायर गरेकाे हो । यस प्रकरणमा अब बिहीबार पर्सा जिल्ला अदालतमा थुनछेक बहस हुने भएको छ ।
यसअघि नेता चौधरीलाई फसाउने षड्यन्त्र भएको हुन सक्ने भन्दै सामाजिक सञ्जालमा आवाज उठेकाे थियाे । त्यसपछि पर्साका सक्रिय राजनीतिक दलहरूले सर्वदलीय बैठक बसेर घटनाको निष्पक्ष छानबिनको मागसमेत गरेकाे थियो ।
