वीरगंज । पर्सा निर्वाचन क्षेत्र नं. २ का नेपाली कम्युनिष्ट पार्टी (नेकपा)का उम्मेदवार मनोज चौधरीले शुक्रबार पनि घरदैलो तथा जनता दर्शन कार्यक्रमलाई निरन्तरता दिएका छन्। उनले वीरगंज महानगरपालिका वडा नं. ६ र ९ मा पुगेर मतदातासँग प्रत्यक्ष भेटघाट तथा संवाद गरेका हुन्।
घरदैलो कार्यक्रमका क्रममा उम्मेदवार चौधरीले स्थानीय बासिन्दासँग छलफल गर्दै क्षेत्रका समस्या समाधानप्रति आफ्नो प्रतिबद्धता व्यक्त गरे। उनले अधिकांश समस्या आधारभूत आवश्यकतासँग सम्बन्धित रहेको उल्लेख गर्दै शिक्षा, स्वास्थ्य, सिँचाइ तथा सडक पूर्वाधार विकासमा राज्यले पर्याप्त लगानी गर्नुपर्ने बताए।
आफू निर्वाचित भएमा क्षेत्रवासीका समस्या समाधानका लागि ठोस पहल गर्ने र विकास निर्माणका कामलाई प्राथमिकतामा राख्ने उनको प्रतिबद्धता थियो। जनताको अपेक्षा अनुसार काम गर्दै जिम्मेवार र उत्तरदायी नेतृत्व प्रदान गर्ने पनि उनले बताए। उम्मेदवार चाैधरीले नेकपाकाे चुनाव चिन्ह तारामा मतदान गर्न आग्रह समेत गरे ।
घरदैलो कार्यक्रममा नेकपाका केन्द्रीय सदस्य बृजलाल पासवान, नेता दुर्गा क्षेत्री, पप्पु मियाँ, विनयलाल गुप्ता, रमेश चौधरी, जयशंकर यादवलगायत नेता तथा कार्यकर्ताहरूको सहभागिता रहेको थियो।
