वीरगंज । राष्ट्रिय स्वतन्त्र पार्टी (रास्वपा) का तर्फबाट पर्सा निर्वाचन क्षेत्र नम्बर–१ का उम्मेदवार हरि पन्तले प्रसाैनी बिर्ता क्षेत्रका मतदातासँग भेटघाट तथा संवाद गरेका छन्। बिहीबार वीरगंज महानगरपालिका वडा नम्बर २३ मा आयोजना गरिएको घरदैलो कार्यक्रममार्फत उहाँले स्थानीय मतदातासँग प्रत्यक्ष भेटघाट गर्नुभएको हो।
घरदैलो कार्यक्रमको सुरुवात स्थानीय हनुमान मन्दिरमा पूजा–अर्चना गरी गरिएको थियो। त्यसपछि कार्यक्रम वडाभित्रका विभिन्न टोलहरूमा सञ्चालन गरिएको थियो। घरघरमा पुगेर उम्मेदवार पन्तले मतदाताको समस्या, गुनासा र अपेक्षा सुन्दै प्रत्यक्ष संवाद गरेका थिए।
कार्यक्रमका क्रममा उम्मेदवार पन्तले स्थानीय नागरिकहरूलाई राष्ट्रिय स्वतन्त्र पार्टीको नीति, उद्देश्य र आगामी कार्यदिशाबारे जानकारी गराउँदै सुशासन, पारदर्शिता र जवाफदेहितामूलक राजनीतिक अभ्यासप्रति पार्टीको प्रतिबद्धता स्पष्ट पार्नुभयो।
राष्ट्रिय स्वतन्त्र पार्टीले आगामी दिनहरूमा पनि जनस्तरसँग प्रत्यक्ष संवाद, सहभागितामूलक कार्यक्रम तथा घरदैलो अभियानलाई निरन्तरता दिने जनाएको छ। पर्सा–१ मा रास्वपाको अभियान जनमुखी र संवादप्रधान ढंगले अघि बढिरहेको संकेतका रूपमा यस कार्यक्रमलाई हेरिएको छ।
