वीरगंज । पर्साको जगरनाथपुर गाउँपालिकाले बढ्दो चिसो र शितलहरका कारण प्रभावित जनजीवनलाई सहज बनाउन सबै वडामा दाउरा (काठ) वितरण गरेको छ। चिसोको प्रभावबाट विशेषगरी बालबालिका, वृद्धवृद्धा तथा विपन्न वर्गलाई सुरक्षित राख्ने उद्देश्यले वडास्तरमा समूह गठन गरी सामूहिक रूपमा दाउरा वितरण गरिएको गाउँपालिका अध्यक्ष श्रीकान्त प्रसाद यादवले जानकारी दिए।
अध्यक्ष यादवका अनुसार अत्यधिक चिसोका कारण कसैलाई पनि समस्या नपरोस् भन्ने लक्ष्यसहित यो तत्कालीन राहत कार्यक्रम सञ्चालन गरिएको हो। उनले भने, “चिसो र शितलहरको प्रभावबाट जनतालाई जोगाउन आगो ताप्ने प्रयोजनका लागि दाउरा वितरण गरिएको हो, यो जनस्वास्थ्यलाई ध्यानमा राखेर गरिएको पहल हो।”
उनले चिसोको अवस्था कायमै रहेसम्म आवश्यकता अनुसार थप राहत तथा सहयोग कार्यक्रमहरू समेत सञ्चालन गरिने स्पष्ट पारे। जनताको स्वास्थ्य र सुरक्षालाई प्राथमिकतामा राख्दै जगरनाथपुर गाउँपालिका सधैं नागरिकसँगै रहेको उल्लेख गर्दै अध्यक्ष यादवले सबैलाई सुरक्षित र न्यानो रहन अनुरोध गरेका छन्।
